Fota: pickpik.com
«Tajemny Santa» (Secret Santa) — ananimny abmien padarunkami. Arhanizavać jaho možna ŭ luboj supolnaści: pracoŭnym kalektyvie, siamji, hrupie siabroŭ, susiedziaŭ, tavaryšaŭ pa chobi. A kali takoj supolnaści ŭ vas niama, možna stvaryć jaje anłajn śpiecyjalna pad «tajemnaha Santu» abo dałučycca da supołak pa abmienie padarunkami, stvoranych raniej.
Uźniknieńnie hulni ŭ «tajemnaha Santu» źviazvajuć z Łary Ściuartam, amierykanskim fiłantropam. U 1971 hodzie ŭ amierykanski horad Chjustan pryjšoŭ biazdomny čałaviek, jaki pakutavaŭ ad hoładu. Pa lehiendzie, jon spyniŭsia, kab pajeści, u zakusačnaj Dixie Diner i zamoviŭ najvialikšy śniadanak u mieniu, bo płanavaŭ źbiehčy z kaviarni da taho, jak jamu pryniasuć rachunak.
Ale ŭłaśnik ustanovy Ted Chorn zdahadaŭsia, što płanuje jaho hość, i praciahnuŭ jamu banknotu ŭ 20 dalaraŭ sa słovami «dumaju, vy heta ŭpuścili». Tym biazdomnym jakraz i byŭ Łary Ściuart, budučy biznesmien, jaki paźniej sabraŭ bahaćcie na telekamunikacyjach. Ciaham mnohich hadoŭ Ściuart prybiraŭsia ŭ kaścium Santa-Kłaŭsa i razdavaŭ hrošy biednym, što i zrabiła jaho pieršym tajemnym Santam.
Jak zładzić takuju hulniu? Pieršy etap — vyśvietlić, chto dla kaho rychtuje prezient. Pamiatajcie pra tajemnaść i pra toje, što imiony aŭtaraŭ padarunkaŭ musiać zastacca nieraskrytymi. U vypadku, kali ŭsie ŭdzielniki hulni mohuć sustrecca razam, niachaj kožny ź ich napiša na maleńkaj papiercy svajo imia i skamiačyć jaje tak, kab imia nie było bačnaje. Paśla pakładzicie ŭsie papierki ŭ skryniu, šapku ci miech, i niachaj kožny z udzielnikaŭ vyciahnie imia taho, dla kaho jon rychtuje padarunak. Kali čałaviek vyciahvaje svajo ŭłasnaje imia, niachaj jon znoŭ pasprabuje vyciahnuć papierku.
Nie možacie sustrecca? Skarystajciesia admysłovymi sajtami, jakija dapamohuć pryznačyć tajemnych Santaŭ anłajn — heta možna zrabić tut, tut i tut.
Kab palehčyć žyćcio tajemnym Santam, možna stvaryć anłajn ci afłajn śpis, kudy kožny z udzielnikaŭ hulni napiša niekalki idej dla budučaha padarunka, a možna prosta damovicca ŭ supolnaści, ź jakich padarunkaŭ varta vybirać. A kab Santa nie zhaleŭ ci nie abraŭ zanadta prosty i niecikavy prezient, damoŭciesia, na jakuju sumu varta aryjentavacca. Važna jaje prytrymlivacca, bo zanadta darahi abo tanny padarunak moža vyklikać niepryjemnyja pačućci.
Važna vyznačyć datu, kali ŭsie padarunki musiać być hatovyja. Toje, što vy dorycie padarunak čałavieku, jakoha vybirajecie nie sami, užo harantuje peŭny niestandartny padychod da hulni. Ale ŭsio roŭna pastarajciesia adyści ad zvykłych prezientaŭ nakštałt kubku dla kavy ci karobki cukierak, pasprabujcie padaryć niešta bolš asabistaje. Nie budzie lišnim, kali vy zazirniecie ŭ sacsietki taho, kamu vy robicie siurpryz: jakija ŭ jaho cikavaści, što jon lubić?
Padumajcie dvojčy pierad tym, jak nabyvać u padarunak niejkija śmiešnyja suvieniry ci ałkahol. Navat kali vy ŭpeŭnienyja, što rychtujecie siurpryz dla kahości, chto nie suprać prapuścić čaračku-druhuju, lepš vybirać nie ałkahol, a niešta źviazanaje ź im — naprykład, što nakont hrełki dla śpirtnych napojaŭ?
Paśla hetaha pryznačajuć novuju sustreču, na jakoj ŭsie tajemnyja Santy mohuć, naprykład, pakłaści padarunak pad jełačku. U pryznačany čas možna jaho raspakavać i dalej pasprabavać adhadać, chto ž staŭ sioleta vašym tajemnym Santaj.
Kali ž hety farmat hulni vam abrydnuŭ, možna raznastaić jaho inšymi viersijami. Da prykładu, jość varyjant pad nazvaj «Bieły słon». Vy možacie kuplać padarunak damoŭlenaha koštu i nie rychtujecie jaho dla kankretnaha čałavieka. Prezienty hatovyja? Składvajecie ich razam i ŭ čarzie, jakuju vyznačaje losavańnie, vyciahvajecie dla siabie padarunak. Navat dazvolena «kraści» prezienty: kali niechta raspavioŭ, što žadaje dla siabie pryhožy švedar z aleniami i ŭžo raspakavaŭ jaho, śmieła zabirajcie švedar sabie. Toj ža, u kaho «skrali» padarunak, moža raspakavać novy prezient ci «skraści» padarunak u inšaha čałavieka. Hulnia skančvajecca, kali kožny ŭdzielnik maje padarunak.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Jakaja historyja chavajecca za hałoŭnymi navahodnimi chitami
Niamieckaja para pastaviła ŭ siabie doma 555 kaladnych jalinak. I heta suśvietny rekord
