Alaksandr Apiejkin u studyi «Biełsata». Skryn videa: @belsat_news / YouTube
U efiry razvažali, ci nie lepš źniać sankcyi ź dziciača-junackaha sportu. Padčas dyskusii Siarhiej Padsasonny zaŭvažyŭ, što tak na spabornictvy zmohuć patrapić i dzieci namienkłatury.
Na heta Apiejkin adkazaŭ, što dzieci čynoŭnikaŭ taksama biełarusy.
«My nie možam ciapier brać i padzialać dziaciej. Tut treba hladzieć trochi šyrej. Zrazumieła, što jość prablema palitviaźniaŭ. Ale nielha dzialić našu budučyniu. Bo dzieci — naša budučynia. Nielha kazać, što hetyja dzieci naležać čynoŭnikam, a hetyja nie. Dzieci ŭvohule ni za što nie adkazvajuć».
«Režym robić manipulacyi siarod hetych dziaciej. Apranaje ich u dziaržaŭnuju simvoliku. I režym trymaje ŭ turmach niepaŭnaletnich», — nahadaŭ Padsasonny.
Pa słovach kiraŭnika Fondu spartovaj salidarnaści, kali dzieci siońnia buduć praciahvać jeździć na turniry ŭ Rasiju i padsiłkoŭvacca jaje ducham, to i ŭ dalejšym buduć apałahietami hetaj idei.
«Naša zadača — realna ideałahična dazvolić im bačyć inšaje. Realna intehravać ich u jeŭrapiejskuju prastoru. Kab jany heta bačyli, kab tut znachodzili siabroŭ. Kab z nami sustrakalisia, kali jany siudy pryjeduć», — adznačaje Apiejkin.
Padsasonny pacikaviŭsia, što budzie, kali ŭ zamiežnych pajezkach da dziaciej buduć prystaŭleny kadebešniki, jakija nie dazvolać nijakich sustreč. Jon spasłaŭsia na dośvied Savieckaha Sajuza i Paŭnočnaj Karei.
Apiejkin ličyć, što takoha nie budzie. «Ja nie dumaju, što ŭžo da takoj krajniaj miery dojdzie, što ź dziciačymi kamandami buduć pryjazdžać kadebešniki. Navat kali ŭ Savieckim Sajuzie isnavała takaja praktyka, heta nie pieraškadžała ludziam bačyć, jak žyvuć jeŭrapiejskija krainy, ZŠA. A paraŭnoŭvać Biełaruś i Paŭnočnuju Kareju jašče rana. Naša zadača — doŭhaterminovaja».
Pa słovach Apiejkina, jon bačyć, kolki času kaštuje vychavańnie adnaho aktyvista demakratyčnych sił. «Ludzi nie robiacca aktyvistami voś prosta tak, na raz-dva. Heta realna hady pracy. Treba, kab čałaviek intehravaŭsia ŭ niejkija prahramy, mieŭ kantakty z supolnaściu».
«Kali my budziem na dziciačym uzroŭni adsiakać kantakty, stvarać izalacyju, atrymlivajecca, što dzieci buduć bačyć adziny śviet», — padkreślivaje kiraŭnik Fondu spartovaj salidarnaści.
Pa słovach Padsasonnaha, ciapier moładź ź dziaržaŭnaj simvolikaj možna rehularna sustreć u aeraporcie Vilni. Značyć, niekatoryja dzieci ŭsio-taki lotajuć. Nakolki jany stali jeŭrapiejskimi ź dziaržaŭnaj simvolikaj?
Apiejkin raspaviadaje, što ciapier moładź prymaje ŭdzieł u niekatorych pryvatnych turnirach. A adnosna dziaržaŭnaj simvoliki zaŭvažaje, što šmat spartoŭcaŭ, jakija padtrymali pratesty ŭ 2020 hodzie, taksama lotali ź dziaržaŭnaj simvolikaj.
Apiejkin adznačaje, što nie lubić padziełu: «Što značyć niedemakratyčnyja dzieci ci dzieci čynoŭnikaŭ? Dzieci nie adkazvajuć za baćkoŭ. Heta ŭ nas asnoŭny pryncyp. Niama takoha nadzialeńnia. Nielha jaho štučna stvarać».
«Pry hetym adkazvajuć dzieci palitźniavolenych. Maci zastajucca za kratami. Dziaciej vychoŭvajuć babuli ci niechta ź blizkich. My na heta pavinny zakryć vočy?» — spytaŭ Padsasonny.
«Što pasieješ, to pažnieš. Kali my budziem siejać padzialeńnie i realnuju nianaviść pamiž biełarusami, to budziem heta padtrymlivać. Dzieci nie pavinny za heta adkazvać», — upeŭnieny Apiejkin.
Čytajcie jašče:
Alaksandru Hierasimieniu i Alaksandra Apiejkina dadali ŭ «Śpis ekstremistaŭ»
