Usie fota: asabisty archiŭ hierojaŭ
16 hadoŭ słužyli ŭ teatry, a zatym — syšli ŭ pradprymalnictva
— Z mužam my žyviem u horadzie Mazyr i zjaŭlajemsia členami Sajuza majstroŭ narodnaj tvorčaści Biełarusi. Andrej u svoj čas skončyŭ Homielski mastacki kaledž i Biełaruski dziaržaŭny ŭniviersitet kultury i mastactvaŭ, a ja — Babrujski dziaržaŭny technałahičny kaledž.
Z mužam doŭhi čas pracavali razam u Mazyrskim dramatyčnym teatry imia Ivana Mieleža. Ja — mastak-butafor, a moj muž Andrej — mastak-dekaratar, jaki prajšoŭ karjerny šlach da hałoŭnaha mastaka teatra.
Da dumki zaniacca pradprymalnictvam my pryjšli ŭ 2017 hodzie. Pajšli z teatra, u jakim prapracavali kala 16 hadoŭ. Čamu vyrašyli tak źmianić žyćcio? Usio prosta: my prajšli ŭsie etapy pa karjernych uschodach i zrazumieli, što ŭpierlisia ŭ stol pa zarobku, jaki pieraadoleć u teatry nie zmožam. Dy i zaŭsiody chaciełasia zaniacca svajoj ułasnaj spravaj, kab mieć mahčymaść pavysić dachod. Viadoma, dla nas heta było vyjście z zony kamfortu. Ale zaraz absalutna nie škadujem ab hetym rašeńni.
Ciapier naša ramiastvo — heta asnoŭnaja dziejnaść biez sumiaščeńnia z najomnaj pracaj. U pačatku svajho šlachu my zajmalisia vyklučna žyvapisam i ŭdzielničali ŭ roznych vystavach.
Potym zjaviłasia ideja stvarać vyraby z dreva: pano, śviacilni, suvieniry. Viadoma, jany kaštujuć značna tańniej za karciny, ale zatoje prynosiać dadatkovy dachod. Mahu skazać, što pieršapačatkova naša tvorčaść była kampilacyjaj i paŭtorami idej z roznych viadomych sajtaŭ, naprykład, Pinterest. Heta była sproba piara, tym bolš za čas pracy ŭ teatry ŭ nas byŭ nazapašany vialiki dośvied pracy z roznymi materyjałami.
Na pačatkovym etapie treba kala $150
Vydatki na pačatkovym etapie byli nievialikija: my nabyli b/k łobzikavy stanok, jaki kaštavaŭ kala $100. Jašče kala $50 patracili na materyjały, kab padrychtavacca da našaj pieršaj vielikodnaj vystavy. Za hetuju sumu nabyli listy faniery i šlifavalnyja skurki. Tady my rabili ŭsio z hetaha materyjału: lalečnyja domiki, śviacilni, klučnicy i inšyja pradmiety.
Z časam spatrebiŭsia elektrałobzik, istužačnaja piła, rejsmus, kampresar, roznyja šlifavałki. Taksama treba było abstalavać pamiaškańnie ŭ našaj chacie. Na heta spatrebiłasia 6 hadoŭ, a zatraty skłali kala $2000.
«Pieramahli ŭ konkursie i zrazumieli, što ŭsio robim pravilna»
Adnojčy z mužam pa radyjo pačuli ab praviadzieńni konkursu. My raspracavali niekalki statuetak «Bierahinia» ź biełaruskim narodnym arnamientam, dziakujučy jakim zaniali pryzavoje miesca ŭ naminacyi «Suvienir-cacka». Pieramoha nas natchniła, i my zrazumieli, što ruchajemsia ŭ pravilnym napramku. Z hetaha momantu i pačałasia historyja našych suvienirnych aniołaŭ.
Sama ideja — płoskaja statuetka z rośpisam — nie novaja. Viadoma ž, niešta padobnaje jość u narodaŭ roznych krain u vyhladzie cacak z elemientami, jakija ruchajucca. U pracesie pracy vyrašyli, što našy vyraby buduć pazicyjanavacca jak interjernaja statuetka-suvienir, heta značyć nie mieć utylitarnaha pryznačeńnia, tolki jak upryhožvańnie interjeru.
Idei bolšaj častki prac zjaŭlajucca paśla vystaŭ i znosin z naviedvalnikami. Z kožnym zapytam ad klijentaŭ kalekcyja ŭvieś čas papaŭniajecca. Stupar u pracy byvaje redka. Dy i to tolki ad stomlenaści. U takija momanty važna pamianiać rod dziejnaści, naprykład, možna zaniacca domam ci ŭčastkam. A voś dla muža Andreja lepš za ŭsio — heta vyjechać na eciudy na niekalki dzion.
«Časta zakazvajuć, kab ździvić zamiežnych siabroŭ»
Z časam našaj majsterni Angels artwood udałosia zaniać svaju nišu siarod biełaruskich ramieśnikaŭ. Ciapier my vyrablajem statuetki «Anioły», «Bierahini», a taksama siamiejnyja kampazicyi z kaštoŭnych parod draŭniny: dub, morany dub, arech, hruša, bez, alešyna — z nastupnym kropkavym rośpisam mastackimi akryłavymi farbami. Materyjały ŭ asnoŭnym kuplajem, ale niekatoruju draŭninu narychtoŭvajem i sami, naprykład, hrušu, akacyju, bez.
Našy vyraby — heta 100% ručnaja praca. Na pieršym etapie ad ruki malujecca eskiz, vypiłoŭvajecca narychtoŭka statuetki i elemienty (ruki, kryły i roznyja detali kampazicyi). Zatym robicca šlifoŭka, hruntoŭka, a zatym paŭtornaja šlifoŭka. Paśla hetaha my razmaloŭvajem uručnuju i vyrablajem kropkavy rośpis ź finalnym pakryćciom łakam.
Zboku moža zdacca, što ŭsio davoli prosta. Ale heta tolki na pieršy pohlad. Nasamreč heta składany i karpatlivy praces. Navat udvaich pracavać niaprosta, bo šmat času i sił sychodzić na stvareńnie vyrabu. A jašče treba narychtavać materyjał, absłužyć stanki, nabyć raschodniki, dy i prosta paśla pracy prybrać majsterniu. Asobnaje nieabchodna vyłučyć čas na fatahrafavańnie vyrabaŭ, viadzieńnie staronki ŭ Instagram, znosiny z zakazčykami, adpraŭku pasyłak.
«U miesiac zarablajem 2500-3000 BYN»
Kankurentaŭ, jakija vykonvajuć takija ž suvieniry, u nas niama. Ale mnohija ramieśniki pradajuć u našym ža canavym siehmiencie: ad 60 da 80 rub. — siaredni ček za vyrab.
Lepš za ŭsio na vystavach realizujucca adzinočnyja aniołački, a praz sacyjalnyja sietki čaściej zamaŭlajuć siamiejnyja kampazicyi. Ciapier u siarednim nam z mužam udajecca zarablać u miesiac kala 2500-3000 rubloŭ. Kala 25% idzie na raschodnyja materyjały, transpart i h.d.
Asnoŭnaja metavaja aŭdytoryja — heta naviedvalniki vystavak, jakija ceniać i lubiać vyraby ručnoj pracy. Udzielničajem u vystavach «Čaroŭny Młyn», «Vialiki modny markiet», «Słavianski bazar» u Viciebsku, a taksama na haradskich śviatach Homiela, Połacka, Hrodna, u Babrujsku na «Vianku Družby», «Aŭtarskija štučki» ŭ Sankt-Pieciarburhu i mnohich inšych. Kožnaje mierapryjemstva kaštoŭnaje znajomstvam i enierhietyčnym abmienam. Takija znosiny dajuć natchnieńnie dla vyrabu novych prac.
Uzrostavaha dyjapazonu ŭ našych klijentaŭ niama, nabyvajuć ludzi roznych uzrostaŭ, čaściej za ŭsio žychary Minska. Darečy, mnohija statuetki zamaŭlajuć, kab ździvić zamiežnych siabroŭ z Francyi, Hiermanii, Čechii, Hruzii, Polščy. Sprava ŭ tym, što my robim statuetki pa fota, tamu pa vyjavie jany buduć padobnyja z tymi, dla kaho nabyvajucca padarunki.
«Ciapier tolki adna prablema — niedachop času»
Viadoma ž, u pačatku stanaŭleńnia našaha biznesu ŭźnikali składanaści. My stali ramieśnikami, ale zusim nie razumieli, jak nieabchodna pradavać našyja vyraby. Było šmat sprob i pamyłak, bo nie viedali, u jakoj vystavie varta ŭdzielničać, a jakaja nie pryniasie nijakaha vyniku. Dy i naviedvalniki takich mierapryjemstvaŭ raniej nie tak aktyŭna karystalisia sacyjalnymi sietkami, tamu dachod zaležaŭ vyklučna ad prodažu na vystavach. Paśla taho jak prajšli hety šlach, paznajomilisia z kalehami i atrymali svoj dośvied, žartujem, što jość zaraz tolki adna prablema — niedachop času.
Ź mierkavańniem, što zajmajemsia niesurjoznaj spravaj, sutyknulisia tolki tady, kali syšli z asnoŭnaj pracy, majučy dvuch niepaŭnaletnich dziaciej. Kolki nierazumieńnia ad ludziej bačyli ŭ toj momant zboku! Ale ŭsie rodnyja padtrymlivali, a maja małodšaja siastra Hanna jak nichto vieryła ŭ našu spravu. I kali byli składanyja pieryjady ŭ pieršy hod, jana zaŭsiody ŭpeŭniena kazała: vašy pracy jašče buduć raźlatacca pa ŭsim śviecie! Za takuju padtrymku my joj ščyra ŭdziačny.
«Pracujem 12 hadzin u dzień praktyčna biez vychodnych»
Pracujem my va ŭłasnym pryvatnym domie, dzie jość stalarnaja majsternia i mastackaja studyja. Naohuł uvieś naš dom — heta vialikaja prastora dla tvorčaści.
Usia naša rekłama — hetyja žyvyja znosiny na vystavach, praz Instagram i sarafannaje radyjo. Dla nas vielmi važny tvorčy składnik, tamu dvuch padobnych vyrabaŭ u nas praktyčna niama. U dzień vyrablajem kala 5 statuetak, dla hetaha davodzicca pracavać pa 8-10 hadzin za sutki. A taksama nieabchodna vyłučyć čas na Instagram, adpraŭku pasyłak, padrychtoŭku pałotnaŭ i ramak, vybar siužetu dla karciny. Voś tak i vychodzić praktyčna 12 hadzin za dzień, dy i pracujem praktyčna biez vychodnych.
Siezonnaści ŭ prodažach nie adčuvajecca. Viadoma, pierad Novym hodam prodažaŭ bolš, zatoje ŭletku jość turysty. Kramy, ź jakimi my supracoŭničajem, zaŭsiody čakajuć našyja vyraby. Zatoje čas hoda, jak my zaŭvažyli, upłyvaje na kalarovuju palitru. Uzimku bolš zakazvajuć biełaśniežnych aniołaŭ, uviesnu huščaru zialonyja, a kali kvitnieje łavanda — u palitry adrazu zjaŭlajucca bezava-łavandavyja adcieńni.
Čytajcie taksama:
