Nina Metajer. Fota: Euronews
Tytuł «Najlepšy kandytar u śviecie ŭ 2023 hodzie» 35-hadovaja francužanka Nina Metajer atrymała na vystavie Mižnarodnaha abjadnańnia piekaraŭ i kandytaraŭ u Miunchienie. Pra heta piša Euronews.
Nina naradziłasia ŭ horadzie La-Rašel na zachadzie Francyi, vučyłasia ŭ prestyžnaj kulinarnaj škole Ferrandi ŭ Paryžy, jakaja ličycca adnoj z samych aŭtarytetnych škoł kulinarnaha mastactva ŭ śviecie i pačynaje svaju historyju ŭ 1920 hodzie.
Paśla atrymańnia adukacyi Metajer pracavała ŭ restaranie Le Meurice, a ŭ 2015 hodzie dałučyłasia da kamandy šef-kuchara Žana-Fransua Pježa, jaki chacieŭ atrymać dźvie zorki Mišlen dla svajho Grand Restaurant. Nina Metajer pracavała tam na pasadzie šef-kandytarki, a praz hod restaran atrymaŭ-taki zapavietnyja mišlenaŭskija zorki.
Uznaharoda «Najlepšy kandytar u śviecie ŭ 2023 hodzie» nie pieršaja ŭ skarboncy kandytarki. U 2016-m Nina atrymała zvańnie «Šef-kandytar hoda» pa viersii papularnaha kulinarnaha časopisa Le Chef, a ŭ 2017-m takoje ž zvańnie prysvoiŭ joj restaranny hid Gault et Millau, jaki spaborničaje pa ŭpłyvovaści z suśvietna viadomym Mišlen.
U svaim instahramie Nina vykazała padziaki svaim nastaŭnikam i kaleham pa pracy.
«Heta ŭznaharoda važnaja dla mianie tamu, što maja karjera pačałasia z vypiečki. Ja radaja pradstaŭlać Francyju i ŭnosić svoj układ u pavyšeńnie jakaści pracy piekaraŭ i kandytaraŭ pa ŭsim śviecie», — napisała žančyna.
Mižnarodnaje abjadnańnie piekaraŭ i kandytaraŭ, na vystavie jakoha Metajer atrymała ŭznaharodu, było stvorana ŭ 1931 hodzie. Z tych časoŭ arhanizacyja padtrymlivaje roznyja asacyjacyi chlebabułačnych i kandytarskich vyrabaŭ, a taksama prasoŭvaje pracu kandytaraŭ i piekaraŭ u śviecie.
Čytajcie taksama:
Słojki z syram bry i žuravinami. Recept
Irłandziec teściruje biełaruskija stałoŭki. Voś jakoj ź ich prapanoŭvaje dać mišlenaŭskuju zorku
