Arciom Aleksiajonak. Fota: jahonaja staronka va «UKantakcie»
Arciomu Aleksiajonku 28 hadoŭ. Jon z Kałodziščaŭ, heta pasiołak pad Minskam, kala Uručča.
Mužčyna spačatku vyvučaŭ jurysprudencyju, a paśla — palitałohiju ŭ Biełaruskim instytucie pravaznaŭstva.
Apošnim časam jon pracavaŭ juryskonsultam u kampanii «Biełsportzabieśpiačeńnie», jakaja arhanizoŭvaje spartovyja mierapryjemstvy i trymaje haścinicu «Sport» na minskaj vulicy Jakuba Kołasa.
Arhanizacyja naležyć Ministerstvu sportu i turyzmu.
U videa HUBAZiKa pakazvajecca interfiejs prahramy Tinder, praź jakuju niechta sprabuje paznajomicca z Arciomam. I, chutčej za ŭsio, na inšym kancy siłavik. Dyjałoh abryvajecca na frazie «Davaj znajomicca, Arciomie».
Akaŭnt u telehramie Arcioma nie bačny pa jahonym numary telefona, ale abaronieny nie vielmi nadziejna — u 2019—2020-m jon karystaŭsia ŭłasnym imiem i niknejmam. Tamu niezrazumieła, adšukali jaho praz Tinder abo niepasredna pa akaŭncie.
Ale mahčymaja takaja schiema: z čałaviekam znajomiacca, a paśla prapanujuć vyvieści razmovu ŭ «telehram». Ludzi ŭ prahramach dla znajomstvaŭ zvyčajna nie chavajuć tvaru i svaich danych, dy i stvoranyja jany dla žyvych znosin. Takim čynam siłaviki majuć mahčymaść źviazać čałavieka i jahony akaŭnt navat u tym vypadku, kali jon dobra abaronieny.
Takuju mahčymaść varta ŭličvać. My raim nie davać nieznajomcam vaš asnoŭny, a tym bolš pratesny telehram-akaŭnt i raspaviadać asabistyja padrabiaznaści vašaha žyćcia abo tym bolš palityčnaj dziejnaści.
Zaraz, zhodna ź infarmacyjaj ad hubazikaŭcaŭ, Arciomu pahražaje kryminalnaja sprava za kamientary ŭ telehram-čatach.
Nahadajem, što masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu.
Łukašysty pieraśledujuć usich, chto publična vystupaŭ suprać ich kiravańnia i suprać rasijskaha kantrolu nad Biełaruśsiu.
Z 2022 hoda, paśla napadu Rasii na Ukrainu, biełarusaŭ pačali pieraśledavać taksama za antyvajennyja vykazvańni abo simpatyi da Ukrainy.
Zhodna z padlikami pravaabaroncaŭ, za hety čas u krainie adbyłosia nie mienš za 55 tysiač palityčna matyvavanych zatrymańniaŭ. Pa infarmacyi prakuratury, zaviedziena nie mienš za 12 tysiač kryminalnych spraŭ «ekstremisckaj skiravanaści», heta značyć palityčnaha charaktaru. Ale i pieršaja, i druhaja ličba, chutčej za ŭsio, niapoŭnaja. Palityčna matyvavanych spraŭ moža być našmat bolš, jak i ludziej, jakija prajšli praz zatrymańni.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Jak pačyścić i abaranić vaš YouTube — padrabiazny hajd
Što mienavita siłaviki praviarajuć u smartfonach zatrymanych biełarusaŭ i jak abaranicca
