Try sposaby palepšyć techniku biehu 1

Fota: vecteezy

1. Hladzicie na 2-3 mietry napierad

Nie isnuje adzinaha pravilnaha abo idealnaha sposabu biehu, i ŭ kožnaha biehuna jość svaja technika. Ale kali vaš styl biehańnia vyklikaje bijamiechaničnyja niedachopy, jakija mohuć pryvieści da traŭmaŭ, abo kali vaš sposab biehu nieefiektyŭny i vy tracicie lišniuju enierhiju, to vam, napeŭna, treba ŭnieści karektyvy.

The Times daje słova Semu Merfi, trenieru pa biehu i aŭtaru knihi «Run Your Best Marathon». Voś što jon raić jak hałoŭnaje. 

• «Bieh u vyšyniu»: ujavicie, što hielijevy šaryk ciahnie vas uvierch ad makaŭki; 
• nie namahajciesia rabić zanadta šyrokija kroki, kali naha pryziamlajecca zanadta daloka napieradzie cieła; 
• zasiarodźciesia na darozie, trymajcie fokus prykładna na 2-3 mietrach pierad saboj. 

Vaša hałava važyć prykładna 3-5 kh, kaža Merfi. To ž kali vy hladzicie navokał, uniz abo trymajecie hałavu nabok, hetaja vaha budzie stvarać nahruzku na ciahlicy śpiny i šyi, psujučy vam pastavu.

2. Słuchajcie, jak vy biehajecie

Inšy trenier pa biehu Marcin Jelinh, aŭtar «Running in the Midpack» raić prysłuchoŭvacca da taho, nakolki šumna vy tupajecie padčas praktykavańniaŭ. Kali vy biehajecie tak, što vašyja nohi hučna lapajuć pa ziamli, heta dakładnaja prykmieta taho, što z vašaj technikaj biehańnia niešta nie tak. Varta sprabavać pryziamlacca miakčej, niby vy biažycie pa jaječnaj škarłupinie — takim čynam vy źmienšycie toje, što spartyŭnyja navukoŭcy nazyvajuć viertykalnaj udarnaj nahruzkaj padčas trenavańnia.

Daśledavańnie 249 žančyn-biahuch u British Journal of Sports Medicine pakazała, što spartoŭki z najmienšymi viertykalnymi ŭdarnymi nahruzkami — samyja spakojnyja biehuny — atrymlivali mienš za ŭsio traŭmaŭ.

3. Nie hrymaśničajcie i nie horbiciesia

Napružańnie — vorah płaŭnaha i efiektyŭnaha biehu, kaža biehavy trenier ź Bierkšyra Pedzi Makhrat. Padtrymlivajučy vierchniuju častku cieła rassłablenaj, plečy na ​​adnym uzroŭni i raściskajučy kułaki, vy zdymajecie napružańnie, z-za jakoha bieh zdajecca ciažkaj pracaj. Bieh u bolš spakojnym styli palapšaje tak zvanuju «ekanomiku biehańnia», što, u svaju čarhu, moža paŭpłyvać na chutkaść i zadavalnieńnie, kaža Makhrat.

Navat vyraz tvaru maje značeńnie. Nie kryviciesia! Daśledčyki z Ulster University dy Swansea University pakazali, što biehuny, jakich prasili ŭśmichnucca padčas sieryi testaŭ na biehavoj darožcy, adčuvali nižejšy pakazčyk nahruzki. Heta aznačaje, što dziejnaść pieražyvałasia lahčej, a bieh byŭ bolš ekanomny: to bok ich arhanizmy spažyvali mienš kisłarodu, čym tyja, kaho prasili chmurycca.

Čytajcie taksama:

Umacavańnie hetych troch zabytych hrup muskułaŭ moža značna palepšyć vašaje zdaroŭje

Dźviuchchvilinnyja treniroŭki, jakija mohuć pradoŭžyć vaša žyćcio na hady

U jaki čas dnia lepš za ŭsio zajmacca sportam? I jak biez stresu vypracavać zvyčku

19

1

4

1

1

2

Nashaniva.com