Uładzimir Pucin. Fota: Getty Image
Pavodle Pucina, vonkavaha ŭździejańnia na samalot nie było, hety fakt nibyta ŭstanaviŭ rasijski Śledčy kamitet padčas rasśledavańnia.
«Mnie kiraŭnik Śledčaha kamiteta dakładvaŭ litaralna dniami: u ciełach zahinułych pry avijakatastrofie vyjaŭlenyja frahmienty ručnych hranat. Źniešniaha ŭździejańnia na samalot nie było — heta ŭžo ŭstanoŭleny fakt, vynik ekśpiertyzy, praviedzienaj Śledčym kamitetam Rasijskaj Fiederacyi».
Taksama Pucin padzialiŭsia z hramadskaściu tym, što ŭ ofisie Pryhožyna, maŭlaŭ, znajšli kakain:
«Na žal, na najaŭnaść ałkaholu abo narkatyčnych srodkaŭ u kryvi zahinułych ekśpiertyza nie pravodziłasia, choć my viedajem, što paśla viadomych padziej u kampanii ŭ Pieciarburhu FSB vyjaviła nie tolki 10 młrd najaŭnymi, ale i 5 kh kakainu. Na moj pohlad, treba było pravieści takuju ekśpiertyzu, ale jana nie była praviedzienaja».
Taksama Pucin zajaviŭ, što dośvied PVK «Vahnier» byŭ «karavym», bo ŭ krainie, maŭlaŭ, adsutničała zakanadaŭstva ab pryvatnych vajskovych kampanijach. I jon nibyta byŭ vielmi ździŭleny, kali daviedaŭsia, što zarobki najmity z PVK atrymlivali najaŭnymi hrašyma.
Samalot ź Jaŭhienam Pryhožynym na borcie raźbiŭsia nad Ćviarskoj vobłaściu Rasii 23 žniŭnia. Usiaho ŭ avijakatastrofie nad Vałdajem zahinuli 10 čałaviek.
29 žniŭnia Pryhožyna pachavali ŭ Sankt-Pieciarburhu na padkreślena nieprestyžnych mohiłkach. Ni Pucina, ni inšych pradstaŭnikoŭ rasijskaj palityčnaj elity na pachavańni nie było. Samo pachavańnie prajšło tajemna.
Čytajcie taksama:
Paśla śmierci Pryhožyna razharnułasia baraćba za jaho spadčynu
«Viedaju tolki toje, što vyžyŭ». Džordž Buš padzialiŭsia ŭspaminami ab Pryhožynie
Paśla śmierci Pryhožyna Zinhman sprabuje pierachapić achoŭnyja kantrakty «Vahniera» — krynicy
