Vyjava: pixabay
Mužčyny, jakija šukajuć lepšaha seksualnaha žyćcia, kali-niebudź mohuć palepšyć situacyju, dziakujučy… pavuku. Brazilskaja farmaceŭtyčnaja kampanija raspracoŭvaje miascovaje lačeńnie erektylnaj dysfunkcyi, atrymanaje ź jadu Phoneutria nigriventer, taksama viadomaha jak «brazilski vandroŭny pavuk», abo taksama «bananavy pavuk». Lačeńnie ŭžo prajšło pieršyja vyprabavańni na ludziach.
P. nigriventer źjaŭlajecca adnosna bujnym i viadomym pradstaŭnikom arachnidaŭ u Paŭdniovaj Amierycy. Jaho ŭkus moža vyklikać u čałavieka pačaščanaje sercabićcie, kurčy, šok i navat śmierć. Ale hety ž jad taksama moža vyklikać pryapizm — stan, kali pienis zastajecca ŭ erekcyi hadzinami zapar. U toj čas jak pryapizm moža być balučym i navat niezvarotna paškodzić pienis u ciažkich vypadkach, niezvyčajny pabočny efiekt pavukovaha ŭkusu daŭno cikavić navukoŭcaŭ, jakija šukajuć nastupnuju Vijahru. Daśledavańni jadu viaducca bolš za dziesiać hadoŭ — i zdajecca, što ŭsia hetaja praca moža narešcie akupicca.
Daśledčyki z Federal University of Minas Gerais u Brazilii kažuć, što jany stvaryli sintetyčnuju viersiju aktyŭnaha inhredyjentu jadu pad nazvaj BZ371A, paviedamlaje Gizmodo. Złučeńnie było zapatentavana i raspracoŭvajecca ŭ jakaści lačeńnia kampanijaj Biozeus. Srodak vykarystoŭvajecca ŭ jakaści miascovaha hielu, jaki nanosicca na pałavy orhan i byccam pavialičvaje pryliŭ kryvi za košt pavyšeńnia ŭzroŭniu aksidu azotu — malekuły, jakaja maje vyrašalnaje značeńnie dla erekcyi.
Raniej u hetym hodzie Biozeus abviaściŭ, što BZ371A paśpiachova prajšoŭ pieršuju fazu vyprabavańniaŭ na ludziach, jakaja ŭ asnoŭnym pryznačana dla paćvierdžańnia biaśpieki lekaŭ. Pa vyniku BZ371A dobra pieranosiŭsia dobraachvotnikami, nie vyklikajučy nijakich sistemnych pabočnych efiektaŭ. Ciapier kampanija praciahvaje maštabniejšuju druhuju fazu vyprabavańniaŭ, jakaja maje pačacca ŭ hetym miesiacy.
Vyprabavańni na hety čas pakazali, što złučeńnie pracuje pry ŭžyvańni minimalnaj kolkaści i biez anijakaj taksičnaści, pakolki jano praktyčna nie vyjaŭlajecca ŭ kryvacioku, kažuć raspracoŭščyki preparata.
Vijahra i padobnyja preparaty ŭžo davoli daŭno efiektyŭna vykarystoŭvajucca pry lačeńni erektylnaj dysfunkcyi, adnak nie ŭsie reahujuć na ich, a inšyja ŭvohule nie mohuć prymać ich z-za niekatorych zachvorvańniaŭ abo ŭzajemadziejańnia ź inšymi lekami. Biozeus śćviardžaje, što BZ371A abapirajecca na novy miechanizm dziejańnia, što moža być pryvabnaj alternatyvaj dla hetych ludziej.
Pavodle danych resursu Clinicaltrials.gov, padčas druhoj fazy preparat vypraboŭvajecca na pacyjentach, jakija pieranieśli vydaleńnie prastaty, što moža paškodzić niervy, adkaznyja za padtrymańnie erekcyi. Čakajecca, što daśledavańnie budzie zavieršana da krasavika 2024 hoda. U toj ža čas kampanija praviaraje, ci zmoža novy srodak dapamahčy taksama ŭ lačeńni niekatorych zachvorvańniaŭ vačej i lohkich.
Čytajcie taksama:
Seks i zdaroŭje ŭ mužčyn iduć u pary
Ciapier aficyjna: mužčyny z kompleksam małoha pienisa čaściej vybirajuć spartyŭnyja aŭtamabili
