Natalla Kalehava i Zianon Paźniak. Fota: fejsbuk, «Naša Niva»
Učora ŭ fejsbuku na staroncy Zianona Paźniaka vyjšaŭ davoli rezki dopis (paźniej joj byŭ častkova adredahavany). U im palityk vykazaŭsia nakont situacyi z mahčymymi novymi abmiežavańniami dla biełarusaŭ u Litvie. Jon vinavacić Ofis Cichanoŭskaj i jahonych supracoŭnikaŭ u supracy sa śpiecsłužbami Rasii i Biełarusi, a Litvu i litoŭskich palitykaŭ — u nianaviści da Biełarusi. Zatoje lidar Kansiervatyŭna-chryścijanskaj partyi BNF zastupiŭsia za Volhu Karač:
«Tym časam roznyja biełarusanienaviśniki i ksienafoby (chutčej, što ahientura FSB) abzyvajuć Volhu Karač u siecivie «ruskaj špijonkaj» i ŭsklikajuć: «Nu čto, tvaŕ putinskaja, dopryhałaś!»
Zdajecca, što hrupa Franaka-Cichanoŭskaj narešcie dastała svaju supiernicu i krytykantku Volhu Karač. Jaje źbirajucca departavać za toje, što vystupała ŭ prakramloŭskich vydańniach «Lenta.ru» i «Hazieta.ru» i što niekali brała intervju ŭ niabožčyka Žyrynoŭskaha (tut užo i łukašystaŭ pieraŭzyšli). Chacia pa hetaj ža łohicy (što vystaŭlena suprać Karač) treba było b najpierš departavać jakraz Cichanoŭskuju i ŭsiu ahienturnuju hrupu. Ale tut heta jak žart».
Dalej Paźniak robić hučnuju zajavu pra toje, što ŭ Litvie byccam by kultyvujecca kultura danosaŭ, jak u «Trecim Rajchu, NKVD i HUBČEKA», — heta chłuślivaje śćviardžeńnie, Litva — demakratyčnaja i pravavaja dziaržava. Jon taksama śćviardžaje, što ŭ «biežancaŭ ad režymu Łukašenki» litoŭskija orhany pravodziać pieratrusy. Apisvaje jon heta tak:
«Užo pačalisia vobšuki ŭ 910 biełarusaŭ, paznačanych dla departacyi. Vobšuki adbyvajucca tak. Palicyja biez papiaredžańnia ŭryvajecca ŭ kvateru i, nie pradjaŭlajučy nijakich dakumientaŭ, pačynaje ŭsio pieravaročvać i «šmanać» (paznajacie počyrk?). Kali niejkaja spadarynia Kalehava stała adrazu telefanavać u prakuraturu, napadniki vybili ŭ jaje z ruk telefon i skazali «zatknucca».
A sutnaść jakraz była ŭ tym, što bieź viedama Kalehavaj palicyja ŭzłamała jaje kvateru i ŭsio tam pieraviarnuła, niešta šukajučy albo chočučy niešta padkinuć. Hety momant (napad na kvateru Kalehavaj) jakraz źniaŭ na telefon druhi ŭciakač-biełarus».
Usio heta ilustravałasia videa biez kantekstu. Na im Natalla Kalehava emacyjna spračajecca ź litoŭskim palicyjantam.
Videa chucieńka pierapościŭ łukašyscki kanał «Žoŭtyja źlivy».
U kanale arhanizacyi Dapamoga, jakoj kiruje Natalla, vyjšła abviaržeńnie. Dapamoga zajaviła, što źviarnułasia ŭ palicyju sa skarhaj na raspaŭsiud asabistaj infarmacyi, a redaktaram staronki Paźniaka dasłanaja prośba pra vydaleńnie videa.
Uviečary zhadki Natalli z publikacyi źnikli.
Kalehava prakamientavała «Našaj Nivie», što vykładzienaje videa nijak nie źviazana ź ciapierašniaj situacyjaj i na im zusim nie toje, što apisvałasia Paźniakom:
«Heta staroje videa, na jakim adlustravana kanfliktnaja situacyja ź litoŭskaj palicyjaj, jakaja daŭno ŭłahodžanaja — na ichnija dziejańni była napisanaja skarha, bo jany pryjšli ź niapravilnymi dakumientami. To-bok palicyja dapuściła pracesualnaje parušeńnie, a prakuratura stała na moj bok. Ja ŭ takich pytańniach vielmi pryncypovaja.
A situacyja zusim nie tyčyłasia biełaruskich spravaŭ. I ja nie viedaju navat, chto źliŭ hetaje videa.
Ja kiruju «Zamkam» («štab» arhanizacyi «Dapamoha», jakoj kiruje Natalla Kalehava. — «NN»), i tam žyvuć roznyja ludzi, u asnoŭnym uciekačy. Ja vyrašaju roznyja spravy i kanflikty, jakija ŭźnikajuć u «Zamku». I toje, što było na videa, — heta šarahovaja situacyja.
Ja rezident Litvy, žyvu tut 23 hady. Maju prava na atrymańnie hramadzianstva. Dapamahaju ludziam, jakija biahuć ad niebiaśpieki. To-bok nijakich prablem ź litoŭskimi ŭładami ŭ mianie niama. I nijakich pieratrusaŭ nie było, tym bolš u parušeńnie pracesualnych normaŭ.
Ja i z Volhaj Karač choć pa-čałaviečy dobra znajomaja, ale ŭ nas niama navat supolnych prajektaŭ. To-bok i sprava z prablemami ź lehalizacyjaj Volhi mianie taksama nijak nie datyčyć.
Toje, što sprabujuć zaraz usio heta niejak źviazać, — heta niapravilna. Biełarusam nielha karystacca adno adnym u niejkich paddyvanovych hulniach. Nielha ŭzvodzić paklop na Litvu, kali heta prosta niapraŭda. I ja nie chaču, kab mianie zamiešvali ŭ niejkija brudnyja i niepraŭdzivyja historyi. Da taho ž takija pravakacyi paharšajuć stanovišča biełarusaŭ u Litvie.
Ja padavała skarhu ŭ palicyju, bo ja nie chaču, kab vyhladała tak, što publikacyja videa adbyłasia z majoj padačy. Kali b heta było pra mianie asabista, to ja b ničoha nie rabiła, ale ja nie chaču, kab byccam by pad maim imiem była raźmieščanaja niepraŭdzivaja infarmacyja pra Litvu. Kali Zianon Stanisłavavič, pry ŭsioj da jaho pavazie, apublikavaŭ niepravieranuju infarmacyju, to heta i jahonaja adkaznaść.
Ciapier, kali Zianon Paźniak ci jahony redaktar vydalili videa, ja napišu ŭ palicyju, što sprava vyrašanaja mirna i pretenzij ja nie maju, i na hetym usio skončycca».
My źviarnulisia taksama da paplečnika Zianona Paźniaka Paŭła Vusava z pytańniem, adkul u ich toje videa. «Ja nie viedaju, chto aŭtar videa i adkul jano», — adkazaŭ jon.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
