Ilustracyjny zdymak. Fota: «Naša Niva»
Aŭtakamis: Niama taho, što rańš było
Ułaśnik aŭtakamisa, jaki zbolšaha śpiecyjalizujecca na prodažy śviežapryhnanych mašyn ź Jeŭropy i ZŠA, kaža, što abaroty hetym letam vielmi słabyja, kali paraŭnoŭvać z tym, što było hod tamu.
«Letaś na majoj placoŭcy byli volnyja miescy. Mašyny pradavalisia vielmi badziora, na doŭha nie zatrymlivalisia. Tady za miesiac my pradavali pa 30-40 aŭto. Kala pałovy kupcoŭ byli rasijanie», — pryznajecca biznesmien.
Ciapier, pa słovach surazmoŭcy, mašyn na placoŭcy bolš, volnych miescaŭ daŭno niama, ale, niahledziačy na šyrejšy vybar, za miesiac ź placoŭki pradajecca nie bolš za 15 mašyn.
«Rasijanam apošnija razy pradavali mašyny ŭ červieni. Za lipień i amal uvieś žnivień na RF ad nas nie pajechała nivodnaha aŭto, bo kurs pajšoŭ uharu i rasijanie amal całkam źnikli».
Tym nie mienš, mužčyna nie ličyć, što situacyja zusim sumnaja, pakolki biełarusy praciahvajuć kuplać aŭtamabili.
«Našy ludzi taksama cikaviacca śviežymi aŭto, ale heta mašyny, jakija kaštujuć nie daražej za 15—20 tysiač. Mašyny ŭ hetym cenavym siehmiencie pradajucca, a voś tyja, chto pryciahnuŭ aŭto koštam ad 30 tysiač i daražej z raźlikam na ruskich — akazalisia ŭ składanaj situacyi.
Padobnych mašyn vielmi šmat, a voś popyt na ich nizki. Baču, što niekatoryja pačynajuć źnižać ceny, ale heta nie vielmi mocna dapamahaje, bo kurs u Rasii za niekalki miesiacaŭ tak prasieŭ, što nijakaj źnižkaj nie kampiensuješ», — kaža surazmoŭca.
Pa nazirańniach aŭtakamisijaniera, ciapier prodažy nie našmat horšyja za 2019—2020 hady.
«Prosta ŭsie pradaŭcy chutka pryzvyčailisia da taho, što mašyny pryviezienyja ź ES i ZŠA pradavalisia vielmi dobra. Amal hod tak i było, što mašyny raźbirali jak pierniki. Sioleta takoha dakładna niama, dy i ŭ ahladnaj budučyni naŭrad ci niešta padobnaje znoŭ budzie», — ličyć ułaśnik aŭtakamisa.
Pierahonščyk: Za lipień pradaŭ adnu mašynu
Naš inšy surazmoŭca zajmajecca pryhonam mašyn ź Jeŭropy. Mužčyna skardzicca, što prodažy hetym letam amal nijakija.
«U mianie zvyčajna 3—4 aŭto ŭ najaŭnaści. Apošnija miesiacy, kali jany pradavalisia narmalna, byli maj i pačatak červienia. Tady jašče da nas davoli aktyŭna jechali pierakupy z Rasii. Potym kurs iznoŭ pačaŭ raści, a cikavaść da mašyn źnižacca. Za lipień pradaŭ adnu mašynu i adnu za žnivień. Abiedźvie zastalisia ŭ Biełarusi. Z Rasii kali niechta i piša, to prapanujuć takija ceny, što navat u nul nie vyjdzieš», — pryznajecca pierahonščyk.
Mužčyna ŭpeŭnieny, što kali da nas znoŭ aktyŭna nie pajeduć rasijanie, to prodažy buduć słabyja, a ceny krychu pačnuć źnižacca.
«Užo ciapier pačynaje naziracca takaja tendencyja, što narod choć i pacichu, ale źnižaje ceny. Tarhujucca ciapier taksama bolš achvotna. Letaś takoha nie było.
Zaraz rynak vidavočna pieranasyčany. Achvotnych zajmacca pieraprodažam aŭto ź Jeŭropy ci Štataŭ značna bolš, čym tych, chto hatovy ich kuplać», — ličyć mužčyna.
Pa słovach surazmoŭcy, u pikavyja miesiacy 2/3 z pryviezienych im mašyn paźniej nakiroŭvalisia ŭ RF.
«Ciapier na Rasiju mašyny taksama jeduć, ale nie tak šmat, jak było hod ci paŭhoda tamu. Na «Malinaŭcy» stała zaŭvažna bolš mašyn, čym było minułym letam. Miarkuju, što kali ničoha nie źmienicca, to rynku spatrebicca miesiacaŭ 5-6, kab pieravaryć toje, što ŭžo paśpieli pryvieźci.
Da taho ž nie treba zabyvacca pra toje, što z 1 žniŭnia ŭ Rasii vyraśli staŭki ŭtylizacyjnaha zboru, kali mašynu pierapradajacie ŭ pieršy hod paśla rehistracyi. Hety čyńnik taksama niehatyŭna adabjecca na našym rynku, bo rasijskim pierakupam stanie składaniej zajmacca pieraprodažam aŭto ź Biełarusi. A ŭ nas mienavita pierakupščyki źjaŭlalisia asnoŭnymi klijentami, pakolki zvyčajnyja aŭtaamatary z RF dajazdžali da nas davoli redka».
Ilustracyjny zdymak. Fota: «Naša Niva»
«Zarobki na mašynach byli nadta vysokija»
Na dumku pierahonščyka sa stažam, na pieranasyčanaść rynku ŭpłyvaje nie tolki kurs rasijskaha rubla.
«U hety biznes za hod pryjšło šmat vypadkovych ludziej, kali ŭsie daviedalisia, što na mašynach možna dobra zarablać. Pačali ŭkładvać hrošy ŭ mašyny. To-bok pradaŭcoŭ stała bolš, čym było da vajny. Mnohija darečy paśpieli dobra padzarabić, bo takich padjomaŭ, jakija byli na piku, nikoli raniej nie było».
Surazmoŭca pryznajecca, što zarobki na mašynach byli nadta vysokija.
«Ludziam padabałasia, kali na aŭto za 25—30 tysiač jany zarablali 5. Tak sapraŭdy było, ale heta, ščyra kažučy, nie narmalna, bo zvyčajna pierahonščyk raźličvaŭ nie bolš, čym na 10% zarobku».
Ilustracyjny zdymak. Fota: «Naša Niva»
«Mnohija adrakajucca takoj zadumy»
Mieniedžar kampanii, jakaja zajmajecca aŭtamabilami z ZŠA na zamovu kaža, što cikavaść da kupli aŭto sa Štataŭ jość, ale klijentaŭ heta nie prybaŭlaje.
«Ludzi cikaviacca, bo viedajuć, što heta vyhadna, ale kali daviedvajucca, kolki jość padvodnych kamianioŭ — tak bolšaść admaŭlajecca ad takoj zadumy. Jość prablemy z raźlikami, niama razumieńnia, što budzie praz 2-3 miesiacy, pakul mašyna budzie dabiracca da klijenta. Takaja niestabilnaść adšturchoŭvaje mnohich».
Mieniedžar kaža, što ŭ niejki pieryjad u ich pačało źjaŭlacca šmat klijentaŭ, jakija zamaŭlali mašynu nibyta dla siabie, ale praź niejki čas jany viartalisia znoŭ, bo tuju mašynu ŭžo pradali.
«Niekatoryja paśpieli za hod tak pa dźvie-try mašyny zamović. Ale ciapier, nakolki ja viedaju, mnohija ź ich nie mohuć pazbavicca ad mašyn, bo na rynku zacišša», — kaža mieniedžar.
«Narodnyja» aŭto zaŭždy karystajucca popytam
Surazmoŭca ź liku pierakupaŭ, jaki zajmajecca «narodnymi» aŭto, kaža, što na rynku niedarahich aŭto nijakich źmien nie adbyvajecca.
«Mašynami za 5—10 tysiač dalaraŭ rasijanie nikoli nie cikavilisia, tamu na hety siehmient situacyja ŭ RF nijak nie ŭpłyvaje. «Narodnyja» mašyny zaŭždy dobra pradajucca. Hałoŭnaje, kab stan byŭ dobry i cana adekvatnaja».
Ilustracyjny zdymak. Fota: «Naša Niva»
Što tyčycca źnižeńnia cen, to, pa słovach pierakupščyka, mašyny, jakija ŭžo daŭno jeździać pa Biełarusi nie tolki nie hublajuć u canie, a naadvarot rastuć.
«Ceny ciapier vysokija, jany nie źnižajucca i naŭrad ci buduć, bo nichto nie pryhonić ź Jeŭropy mašynu, kab jana tut kaštavała 5—7 tysiač. Heta niemahčyma praz vysokija mytnyja pošliny i darahuju dastaŭku. Tamu samyja zapatrabavanyja siarod biełarusaŭ aŭtamabili — mienavita tyja, što ŭžo daŭno jeździać tut. I heta nie tamu, što jany niejkija tam supierkłasnyja. Prosta inšaha vybaru niama. Bo kab niešta pryhnać ź Jeŭropy ci Štataŭ, treba mieć nie mienš za 12—15 tysiač, a takich hrošaj u bolšaści biełarusaŭ prosta niama», — kanstatuje pierakupščyk.
Minskaja firma prapanuje mašyny ź Jeŭropy na zamovu pa nierealna nizkich cenach. U čym padvoch?
Čamu ŭ Pieciarburhu masava harać novyja aŭtobusy MAZ? Nastupstvy sankcyj
Mašyna jak vino. Čamu ŭ Biełarusi rastuć ceny na aŭtamabili rodam z nulavych
