Kinastudyja «Biełaruśfilm» maje namier padać isk u Arbitražny sud Maskvy na Dziaržteleradyjofond Rasii ab abaronie majomasnych pravoŭ na mastacki film «Pryhody Buracina».
Jak zajaviła pres‑sakratar kinastudyi Valancina Bielakova, film «Pryhody Buracina» byŭ źniaty na biełaruskaj kinastudyi ŭ 1975 hodzie i mienavita «Biełaruśfilmu» naležać jaho majomasnyja pravy. Adnak Dziaržteleradyjofond Rasii, u archiŭ jakoha ŭ saviecki čas była pieradadziena kopija filma, letam 2009 hoda ŭpieršyniu pasprabavaŭ heta asprečyć.
Tak, niekalki hadoŭ tamu «Biełaruśfilm» pradaŭ pravy na prakat filma «Pryhody Buracina» pabočnaj arhanizacyi.Sioleta Dziaržteleradyjofond Rasii padaŭ na hetu arhanizacyju isk z zajavaj, što taja nie maje pravoŭ na film. 12 žniŭnia Ministerstva kultury Rasii adazvała ŭ dadzienaj arhanizacyi prakatnaje paśviedčańnie.
Pradstaŭniki nacyjanalnaj kinastudyi «Biełaruśfilm» nazyvajuć heta dziaržaŭnym rejderstvam z boku Dziaržteleradyjofondu Rasii. Jany rychtujuć dakumienty dla razhladu spravy ŭ sudzie. Jak ličyć Bielakova, asnoŭnyja ciažkaści pry razhladzie spravy mohuć być źviazanyja z tym, što film źniaty bolš za 30 hadoŭ tamu.
Pavodle jaje słoŭ, u archivach Dziaržteleradyjofondu Rasii znachodzicca prykładna 170 filmaŭ, jakija źniaty na «Biełaruśfilmie» i, značyć, źjaŭlajucca nabytkam Biełarusi.Karciny nakiroŭvalisia ŭ Dziaržteleradyjofond, bo ŭ saviecki čas jon byŭ centralnaj arhanizacyjaj pa zachoŭvańni filmaŭ z usich respublik SSSR.
Zakonnaje viartańnie nacyjanalnaj intelektualnaj ułasnaści — pytańnie miždziaržaŭnaje, jano patrabuje aktyvizacyi namahańniaŭ z boku adpaviednych dziaržaŭnych orhanaŭ i słužbaŭ, ličać pradstaŭniki «Biełaruśfilma». Pavodle ich mierkavańnia, da hetaha času prablema vyrašajecca vielmi pavolna.
