U Žłobinie viečaram 22 kastryčnika supracoŭniki ŭpraŭleńnia pa narkakantroli i supraćdziejańni handlu ludźmi UUS Homielskaha abłvykankama sumiesna z kalehami z rajadździeła milicyi zatrymali troch hramadzian, jakija naładzili kanał pastaŭki i raspaŭsiudžvańnia narkotykaŭ u rajonnym centry. Pra heta paviedamiŭ supracoŭnik adździeła infarmacyi i hramadskich suviaziej UUS Ihar Hryškievič.
U liku zatrymanych — dva mužčyny 22 i 25 hadoŭ i 23‑hadovaja dziaŭčyna. U ich kanfiskavana bolš jak 30 palimiernych skrutkaŭ z hatovym dla realizacyi amfietaminam, a taksama marychuana. Znojdzieny i jašče nie rasfasavany parašok.
Pavodle słoŭ Hryškieviča, złačynnaja hrupa mieła dakładnaje raźmiežavańnie abaviazkaŭ — adny adkazvali za pastaŭki, inšyja — za realizacyju. Sietka była dobra zakanśpiravana i ažyćciaŭlała pastaŭki narkotykaŭ u vialikich abjomach. Realizacyja sintetyčnych narkotykaŭ rabiłasia tolki peŭnamu kołu spažyŭcoŭ.
«Karpatlivaja praca apieratyŭnikaŭ viałasia na praciahu niekalkich miesiacaŭ. Za hety čas byli ŭstanoŭleny ŭsie ŭdzielniki, schiemy pastaŭki i realizacyi narkotykaŭ. Apieracyja prachodziła adnačasova ŭ niekalkich miescach. Rabiłasia heta tolki z adnoj metaj — vyklučyć lubuju vierahodnaść uciečki infarmacyi ad zatrymanych», — rastłumačyŭ Hryškievič. Usie mierapryjemstvy pa zatrymańni prachodzili pry siłavoj padtrymcy bajcoŭ padraździaleńnia milicyi śpiecyjalnaha pryznačeńnia.
U dačynieńni da zatrymanych raspačata kryminalnaja sprava.
Usiaho za dzieviać miesiacaŭ na terytoryi Homielskaj vobłaści vyjaŭleny 522 złačynstvy, jakija źviazany ź niezakonnym abarotam narkotykaŭ, amal pałova ź ich — zbyt narkatyčnych srodkaŭ.
