Urmas Rejnsału. Fota: postimees.ee
Pa słovach kiraŭnika estonskaha MZS, u kancy žniŭnia ŭ Prazie ŭ jaho zapłanavanaja sustreča ź ministrami zamiežnych spraŭ inšych dziaržaŭ, na jakoj jon pradstavić płan ahulnajeŭrapiejskich abmiežavańniaŭ dla hramadzian Rasii.
Rejnsału taksama zaklikaŭ inšyja krainy rehijona spynić vydaču turystyčnych vizaŭ rasiejcam, «heta značyć spynić šastańnie praź miažu».
Pavodle jaho słoŭ, vydača takich dazvołaŭ narmalnaja ŭ zvyčajnaj situacyi, ale «niejmaviernaja va ŭmovach vajennaha času».
Sama Estonija prypyniła vydaču turystyčnych vizaŭ hramadzianam Rasii jašče ŭ sakaviku. Pry hetym tyja, u kaho ŭ Estonii jość svajaki, a taksama tyja, chto prosić vizu pa «humanitarnych mierkavańniach» abo ŭ miedycynskich metach, usio jašče mohuć padać zajaŭku.
U kancy lipienia Talin zrabiŭ bolš žorstkimi praviły, zabaraniŭšy rasijanam padavać dakumienty na atrymańnie časovaha dazvołu na žycharstva abo vizy ŭ metach navučańnia ŭ Estonii.
Adnak, zajaviŭ Rejnsału, hramadzianie Rasii ŭsio adno traplajuć u krainu pa vizach inšych dziaržaŭ. «Hetuju myšynuju naru treba zatknuć», — adznačyŭ jon.
Akramia ahulnajeŭrapiejskaj zabarony, u Estonii nieabchodna ŭvieści miery na nacyjanalnym uzroŭni, ličyć kiraŭnik MZS. Jon pryvioŭ u prykład Łatviju, dzie pry ŭjeździe rasijskim hramadzianam nieabchodna padpisać dakumient z asudžeńniem vajennaj apieracyi na Ukrainie. «Taki pryncyp taksama možna było b uziać za asnovu pry atrymańni hramadzianstva [Estonii] šlacham naturalizacyi», — skazaŭ Rejnsału.
Praŭda, naŭrad ci Estonii ŭdasca ŭ hetaj spravie dabicca poŭnaha pośpiechu.
U Jeŭrakamisii ŭžo zajavili, što poŭnaj zabarony na vydaču vizaŭ jakoj-niebudź krainaj ES być nie moža.
https://nashaniva.com/296379