Jak śćviardžajuć łukašenkaŭskija prapahandysty, va Ukrainie ŭ mahazinach uvodziacca ceńniki i apłata ŭ złotych. «Žychary Ciarnopalskaj i Lvoŭskaj abłaściej Ukrainy ŭ sacyjalnych sietkach dzielacca fatahrafijami z kramaŭ, dzie ceny ŭ dvuch valutach — ŭkrainskich hryŭniach i polskich złotych. Ludzi aścierahajucca, što chutka ich rehijony stanuć polskimi abłaściami. I vyšejšaje kiraŭnictva tolki hetamu spryjaje», — breša ŭ svaim siužecie ANT.
«Usio bolš vidavočna, što haspadarami na zachodnich ŭkrainskich ziemlach stanoviacca mienavita palaki, jakim užo zakanadaŭča pieradali na hetych terytoryjach asablivy status. A pravały ŭ ekanomicy krainy Varšava sprabuje zaretušavać mienavita takimi sumnieŭnymi pośpiechami pa adradžeńni byłoj impieryi», — dadajuć prapahandysty.
U jakaści «dokazaŭ» pryvodziacca nieviadoma dzie i kim zroblenyja fotazdymki ceńnikaŭ.
Na ceńniku napisana «kapusta», ale na fota my bačym inšuju harodninu. Dy i va Ukrainie niama takich cen na kapustu zaraz: siaredniaja cana za kiłahram u rajonie 20—30 hryŭniaŭ (kala 1,30 — 1,90 biełaruskaha rubla za kiłahram).
Prapahandysty nie pryvodziać nijakaj pieršakrynicy. Fotazdymki prysutničajuć vyklučna na biełaruskich i rasijskich prapahandysckich resursach, ale na ŭkrainskich miedyjaresursach i supołkach ničoha padobnaha niama.
Anałahičnyja naratyvy pra ceńniki ŭ złotych možna sustreć i ŭ efiry inšych łukašenkaŭskich kanałaŭ.
Nasamreč, nijakich ceńnikaŭ u złotych va ŭkrainskich mahazinach niama. «Naša Niva» asabista ŭ hetym pierakanałasia. Usie ceny jak byli, tak i zastajucca ŭ hryŭniach. Voś tak vyhladajuć ceńniki ŭ Lvovie.
Ceńniki ŭ dźviuch valutach va Ukrainie možna sustreć tolki na akupavanych Rasijaj terytoryjach. I ceny tam nie ŭ złotych, a ŭ rasijskich rublach.
Na mnohich akupavanych terytoryjach praciahvajuć paralelna znachodzicca ŭ abaračeńni dźvie valuty, chacia akupacyjnaja administracyja nie prychoŭvaje svajho žadańnia intehravać ukrainskija terytoryi ŭ zonu rasijskaha rubla i całkam admovicca ad hryŭni.
Takim čynam, prapahanda takoj chłuśnioj adciahvaje ŭvahu rasijan i biełarusaŭ ad taho, chto realny zachopnik i što rasijanie robiać u Chiersonie i Maryupali.
