U intervju Corriere della Sierra kiraŭnik Katalickaj carkvy paviedamiŭ, što ŭ pieršy dzień vajny razmaŭlaŭ pa telefonie z prezidentam Ukrainy Uładzimiram Zialenskim. Potym jon sustreŭsia z pasłom Rasii.
«Ja chacieŭ zrabić vyrazny žest na ŭsieahulny ahlad i dla hetaha pajšoŭ da rasijskaha ambasadara. Ja paprasiŭ ich patłumačyć, ja skazaŭ: «Kali łaska, spyniciesia», — adznačyŭ Papa Rymski.
Paśla jon daŭ daručeńnie kardynału Paralina paśla 20 dzion vajny paviedamić pra hatoŭnaść pantyfika naviedać Maskvu.
«Adkazu my jašče nie atrymali i praciahvajem nastojvać, navat kali ja bajusia, što Pucin nie moža i nie choča pravodzić hetuju sustreču prosta ciapier. Ale stolki žorstkaści, jak nie spynić?» — skazaŭ Pantyfik.
Papa Rymski nie maje adnaznačnaha mierkavańnia nakont vajskovaj padtrymki Ukrainy z boku krain NATA. Jon taksama nie maje namieru pakul naviedvać u Kijeŭ. «U Kijeŭ ja pakul nie pajedu. Ja pasłaŭ kardynała Michaiła Černi i kardynała Konrada Krajeŭskaha, jakija adpravilisia tudy čaćviorty raz.
Ale ja adčuvaju, što mnie nie treba jechać. Spačatku ja pavinien pajechać u Maskvu, spačatku ja pavinien sustrecca z Pucinym.
Ale ja taksama śviatar, što ja mahu zrabić? Ja rablu toje,što mahu. Kali b Pucin adčyniŭ dźviery…» — skazaŭ Papa.
Pa jaho słovach, jon taksama mieŭ kantakty z patryjarcham Kiryłam. Jany razmaŭlali praz Zoom. Pry hetym Kirył pałovu sustrečy pierakonvaŭ Papu Rymskaha ŭ abhruntavanaści napadu.
«Ja sorak chvilin razmaŭlaŭ z Kiryłam praz zoom. Pieršyja dvaccać jon mnie z papierki začytvaŭ abhruntavańni vajny. Ja vysłuchaŭ i skazaŭ jamu: ja ničoha ŭ hetym nie razumieju. Bracie, my nie dziaržaŭnyja śviatary, my nie pavinny vykarystoŭvać movu palityki, my pavinny havaryć movaj Isusa. My pastyry adnaho i taho ž śviatoha naroda Božaha. Tamu my pavinny šukać mirnyja šlachi, dabivacca spynieńnia ahniu. Patryjarch nie pavinien pieratvaracca ŭ słužku Pucina. Ja mieŭ sustrakacca ź im u Ijerusalimie 14 červienia. Heta mieła być naša druhaja sustreča, my zapłanavali jaje jašče da vajny. Ale ciapier jon taksama zhodny: stop, heta moža być nieadnaznačnym sihnałam», — skazaŭ pantyfik.
Papa Rymski adznačyŭ taksama, što premjer-ministr Vienhryi Viktar Orban pierakonvaŭ jaho, što da 9 maja ŭsio skončycca. Adnak padziei apošnich dzion pakazvajuć na dalejšuju eskałacyju. «Ja nastrojeny piesimistyčna, ale my pavinny zrabić usio mahčymaje, kab spynić vajnu», — skazaŭ Papa Rymski.
