Anatol Bokun. Fota z Ukantakcie.
«Zatrymańnie adbyłosia ŭ 10:15, ja jašče paprasiŭ zafiksavać hety čas. Uziaŭ z saboj kurtku, a taksama sabranuju tryvožnuju torbu dla zatrymańnia, jakaja ŭ mianie zaŭždy z saboj. Z Kapyla pavieźli ŭ Salihorsk, dzie i pačali składać pratakoł zatrymańnia. Mianie zatrymlivali nibyta pa artykule 24.57 «Niezakonnaja arhanizacyja dziejnaści hramadskaj arhanizacyi ci fonda»,
ale pratakoł skłali pa artykule 24.3 «Niepadparadkavańnie zakonnamu patrabavańniu słužbovaj asoby». Maŭlaŭ, kali mianie pryvieźli ŭ RUUS, to ja admaŭlaŭsia vychodzić z mašyny, supraciŭlaŭsia. Sprava ŭ tym, što pa 24.57 mianie mahli zatrymali tolki na try hadziny, a tut na troje sutak», — raskazvaje Bokun.
Mužčyna adrazu ŭdakładniŭ u milicyjanieraŭ, ci jość u dvoryku RAUS videanazirańnie, kab pravieryć, ci sapraŭdy jon admaŭlaŭsia vychodzić z aŭto. Adkazali, što jość, ale sam zapis demanstravać admovilisia, bo ŭ techničnaha supracoŭnika vychadny dzień. U vyniku čas zatrymańnia paznačyli 11:20. Bokun jašče zrabiŭ prypisku i ab videanazirańni, i ab patrabavańni advakata, i ab časie zatrymańnia.
«Na nastupny dzień mianie vyklikali ź IČU ŭ niejkuju dopytnuju, dzie byŭ supracoŭnik ABEZ, jon prapanavaŭ aznajomicca z materyjałami spravy pa artykule 24.57, ale ja admoviŭsia heta rabić biez advakata.
11 maja kančalisia troje sutak z momantu majho zatrymańnia, ja spytaŭ jašče ŭ dziažurnaha, kolki času i čamu mianie nie adpuskajuć. Na heta mnie adkazali, što składajecca jašče adzin pratakoł, chutka mianie aznajomiać. Sapraŭdy, praz paŭhadziny pryjšoŭ učastkovy inśpiektar, jaki skłaŭ na mianie pratakoł pa artykule 24.23 «Parušeńnie arhanizacyi masavych mierapryjemstvaŭ». Ja znoŭ skazaŭ, što maju abaroncu i što sam znajomicca ni z čym nie budu. Inśpiektar užo źbiraŭsia sychodzić, tady ja spytaŭ, ci zatrymany. Jon kaža, što tak. Ale dzie tady pratakoł zatrymańnia? Milicyjanier doŭha šukaŭ, a potym dastaŭ čysty arkuš papiery i staŭ zapaŭniać. Na toj momant było ŭžo 11:55, ale znoŭ časam zatrymańnia paznačana 11:20».
12 maja adbyŭsia sud pa artykule 24.23. Pakolki Bokun pryciahvaŭsia pa im nie ŭpieršyniu, to sudzili pa treciaj častcy, sudździa daŭ najbolšy mahčymy termin — 30 sutak. «Maja vina zaklučałasia ŭ zapisie videazvarotu da biełarusaŭ, dzie ja vinšuju ludziej z Dniom Voli. Zapis adbyvaŭsia 23 sakavika, uvahu hramadskaści ja nie pryciahvaŭ, ničoha nie vykrykvaŭ. Ale sud prachodziŭ standartna, ničoha novaha».
Pratakoł pa artykule 24.57 razhladaŭ namieśnik načalnika Salihorskaha RAUSa Kanapacki. «Jość śpis artykułaŭ, jakija mohuć razhladać nie sudździ, a načalniki i namieśniki načalnikaŭ RAUSaŭ. Sud prachodziŭ za zakrytymi dźviarami, ja padpisvaŭ dakumient ab nierazhałošvańni. Mahu tolki skazać, što mianie abvinavačvali ŭ arhanizacyi fonda dapamohi bastujučych šachcioraŭ. Vynik — 10 bazavych štrafu».
Tolki 31 maja prajšoŭ sud pa «niepadparadkavańni». Anatol Bokun zaznačaje, što było šmat niestykovak i parušeńniaŭ, bačyŭ heta i sudździa. Naprykład, milicyjaniery błytalisia ŭ pakazańniach ab tym, ź jakoha mienavita boku siadzieŭ u aŭtamabili Bokun i ab jakuju siadušku trymaŭsia. «Cikava, što na pieršym pasiedžańni adsutničaŭ pratakoł zatrymańnia. Mnie zdajecca, što jaho šukali pa ŭsich ciomnych kutkach u pastarunku, bo jon byŭ skamiečany i dobra tak paprasavany».
Da 1 červienia Anatol znachodziŭsia ŭ IČU Salihorska, a ad 1 červienia da vyzvaleńnia — u Starych Darohach. Pra byt u izalatary mužčyna nie nadta choča havaryć. «U nas u krainie ničoha nie mianiajecca, tam taksama. Mabyć, stała krychu bolš žorstka, u Salihorsku zusim nie vydavali matracy, nie addavali pieradački. Palityčnych bolej nie było. Kantynhient taki, što doma paskandaliŭ, i jaho zdali ŭ milicyju. Heta nie marskoje ŭźbiarežža, dastatkova ciažka. Ludzi, jakija prajšli praz kałonii i turmy, kazali, što heta barak uzmocnienaha režymu i ŭ kałonii ŭ taki adpraŭlajuć za niejkija parušeńni. Zdaroŭje — nakolki mahčyma, jano prysutničaje».
Anatol Bokun kaža, što najbolš ciažkim była adsutnaść infarmacyi. Tolki adzin raz u kamieru da jaho trapiła hazieta «Arhumienty i fakty». Tym nie mienš niešta atrymlivałasia pačuć i pa radyjo, jak pra pasadku ŭ Minsku samalota Ryanair. «Ja adrazu padumaŭ, što kahości buduć zdymać z rejsa, a kaho mienavita, daznaŭsia tolki praz paru tydniaŭ».
Ciapier Bokun chvalujecca za svaju pasieku, jon bortnik-pačatkoviec. Navat na sudzie prasiŭ adkłaści pakarańnie chacia b da 20-ch čysłaŭ maja, kali skončycca pieryjad rajavańnia ŭ pčoł. U Anatola 15 pčalinych siemjaŭ, i miod — heta ledźvie nie adzinaja mahčymaść zarabić hrošy. U bližejšyja dni Bokun płanuje acanić, u jakuju škodu na pasiecy jamu vylilisia 45 sutak aryštu.
