Wikimedia Commons
«28 miljonaŭ 600 tysiač našych suajčyńnikaŭ uziali ŭdzieł u hetych vybarach… Raisi nabraŭ 17,8 miljona hałasoŭ», — zajaviŭ Orf. Pavodle jaho słoŭ, hetyja ličby pakul papiarednija, adnak užo dajuć mahčymaść havaryć pra pieramohu Raisi, piša TASS.
Viadoma, što sakratar Rady pa metazhodnaści rašeńniaŭ Machsen Razai nabraŭ bolš za 3,3 miljona hałasoŭ, były kiraŭnik Centrabanka Irana Abdalnasier Chiemaci — 2,4 miljona hałasoŭ, namieśnik staršyni Miedžlisa Chasiejn Amir Kazizade Chašemi — bolš za 1 miljon hałasoŭ.
Aficyjnyja vyniki vybaraŭ buduć abvieščanyja na praciahu dnia, udakładniŭ Orf. Pry hetym usio supierniki ŭžo pavinšavali Raisi ź pieramohaj.
Prezidenckija vybary prajšli 18 červienia. Usiaho da ich byli dapuščanyja siem kandydataŭ z 592, što padali zajaŭki.
Jak piša BBC, Raisi viadomy svajoj antyzachodniaj rytorykaj i ličycca blizkim da Viarchoŭnaha lidara Irana Ali Chamieniei.
Ajatale 82 hady, i mnohija pradkazvajuć jamu ŭ pierajemniki mienavita Raisi. Jon na 20 ź liškam hadoŭ maładziejšy, i da pryznačeńnia Viarchoŭnym sudździoj u 2019 hodzie zajmaŭ pasady hienprakurora i namieśnika Viarchoŭnaha sudździ.
Raisi ŭ 1988 hodzie byŭ adnym z čatyroch sudździaŭ, jakija zasiadali ŭ tak zvanych «kamisijach śmierci» i adpravili na pakarańnie dziasiatki tysiač čałaviek. U 2017 hodzie jon užo ŭdzielničaŭ u prezidenckich vybarach, ale prajhraŭ Chasanu Raŭchani.
Dva hady tamu ZŠA dadali Raisi ŭ sankcyjny śpis.
