Pra heta raskazała žonka aktyvista Iryna Anatoljeŭna.
Vaładar Curpanaŭ
«Pieršy raz Vaładara pakarali karcaram jašče da suda — dali try dni.
Za toje, što jon supracoŭnikam turmy zadavaŭ pytańnie na biełaruskaj: «Navošta?» Ich heta razdražniała.
Paśla ja była ź im na spatkańni 8 červienia. Vaładar skazaŭ, što, zdajecca, trochi pamiakčeli nakont jaho biełaruskaha imia i jaho biełaruskaj movy. Ale ž, jak vyśvietliłasia, zusim nie. Praz tydzień, 15 červienia, u nas było druhoje spatkańnie. I Vaładar raspavioŭ, što paśpieŭ za hety čas znoŭ pravieści troje sutak u karcary. Kaža, što kankretny pałkoŭnik vielmi razdražniaŭsia praź jaho biełaruskuju movu.
A kali Vaładar paprasiŭ jaho adkazvać na biełaruskaj, to jaho adpravili ŭ karcar,
— raskazała «Našaj Nivie» Iryna Anatoljeŭna. — U astatnim usio bolš-mienš narmalna. Vaładara nie katujuć, jon zachoŭvaje svaje pryncypy i svajo pačućcio ŭłasnaj hodnaści».
Nahadajem, što 59-hadovy Curpanaŭ spačatku byŭ asudžany na 3 hady chimii, paśla pakarańnie zamianili kałonijaj. Vaładar atrymaŭ chimiju, bo nibyta abraziŭ dvuch sudździaŭ padčas pracesaŭ pa administratyŭkach.
Vaładar — heta staroje słavianskaje imia. Tak, u pryvatnaści, było zvać adnaho z kniazioŭ minskich i połackich.
U pačatku lutaha 2021 hoda aktyvista nakiravali adbyvać chimiju ŭ papraŭčuju ŭstanovu №46 u Kruhłym.
Adnak 16 sakavika stała viadoma, što Vaładara Curpanava źmiaścili ŭ SIZA turmy №4 u Mahilovie. Jamu pastavili ŭ vinu artykuł 415 KK — «Uchileńnie ad adbyćcia pakarańnia». Zhodna z pastanovaj, Curpanaŭ «dapuściŭ šerah parušeńniaŭ paradku i ŭmoŭ adbyćcia pakarańnia». Siarod ich zhadvajecca lažańnie na łožku ŭ niedazvoleny čas i niezapraŭlenaje spalnaje miesca.
Sam jon na svajoj staroncy ŭ fejsbuku śćviardžaŭ, što sprava zaviedzienaja ŭ dačynieńni jaho za toje, što jon zhadžaŭsia pracavać tolki pry vykanańni jaho pracoŭnych pravoŭ — patrabavaŭ zarobak, jaki adpaviadaje minimalnamu pamieru, harantavanym dziaržavaj.
U vyniku Curpanava prysudzili da 2 hadoŭ kałonii va ŭmovach ahulnaha režymu.
Curpanaŭ — viadomaja asoba ŭ Mahilovie. Jon aktyvist apazicyi z kanca 1980-ch hadoŭ, kiravaŭ abłasnoj arhanizacyjaj Partyi BNF. U 1997-m haładaŭ 10 dzion u izalatary. U žniŭni 2020-ha damohsia sustrečy z kiraŭnikami haradskoj i abłasnoj vykanaŭčaj ułady Mahilova.
1 vieraśnia 2020-ha pryjšoŭ na ŭračystuju liniejku ŭ 43-ju mahiloŭskuju škołu i zaklikaŭ piedahohaŭ, jakija pracavali va ŭčastkovych kamisijach, pakajacca za falsifikacyju vybaraŭ. Jaho zatrymali i prysudzili 20 sutak aryštu. Usiaho za čatyry miesiacy pratestaŭ pravioŭ u niavoli 43 dni. 10 dzion trymaŭ suchuju haładoŭku, pratestujučy suprać niezakonnaha źniavoleńnia. Byŭ špitalizavany. Da źniavoleńnia pracavaŭ mantažnikam u pryvatnaj arhanizacyi.
