Sustreča ŭ Ženievie. Fota TASS
«Los Biełarusi i biełarusaŭ znachodzicca ŭ rukach samich biełarusaŭ. Takija sustrečy hłabalnych lidaraŭ vielmi važnyja, ale jany niemahčymyja biez aktyŭnaści samich biełarusaŭ.
Tema Biełarusi sapraŭdy nie była pryjarytetnaj padčas sustrečy, ale toje, što jana ŭvohule była zakranutaja, — heta dobry znak dla našaj krainy. Heta śviedčyć pra toje, što biełaruskaje pytańnie vyjšła za miežy rehijanalnaj paviestki, stała častkaj hłabalnaha pazła. Heta pytańnie biaśpieki ŭ centry Jeŭropy. Kaniečnie, dobra, što ZŠA traktujuć naša pytańnie ŭ kantekście ŭsioj jeŭraatłantyčnaj supolnaści.
Toje, što nie było nijakaha parazumieńnia z kiejsam samalota Ryanair, — heta nie dziŭna. Tut padychody ZŠA i Rasii roźniacca. Kreml lubić čerpać infarmacyju z adnoj krynicy, i rasijanie pakul daviarajuć Łukašenku, niahladziačy na toje, što ŭ mižnarodnaj supolnaści zusim inšaje mierkavańnie, jakoje, jak my čakajem, budzie paćvierdžana 23 červienia. U hety dzień apublikujuć papiaredni dakład mižnarodnaj arhanizacyi hramadzianskaj avijacyi. Tady i stanie bolš padstavaŭ da viartańnia da hetaj temy miž ZŠA i Rasijaj.
Anatol Kotaŭ
Hałoŭnaje — nie było adnaznačnaj abarony z boku Rasii svajho hetak zvanaha sajuźnika. Z bolš hłabalnaha kantekstu pieramovaŭ vynikaje, što z boku ZŠA my bačym bolš prahmatyčny padychod da Rasii. Prahučaŭ termin «paŭhoda», kali budzie zrazumieła, ci vykonvajucca niejkija damoŭlenaści. Hety termin adnosicca i da biełaruskaha kiejsa.
Jość niekalki opcyjaj, jakija vynikajuć z sustrečy Pucin-Bajden, dla biełaruskaha režymu. Albo nie sapsavać damoŭlenaści i pajści na miakki kanstytucyjny tranzit ułady, na čym nastojvaje Kreml, albo pasprabavać uźniać staŭki ŭ hetaj hulni da niabačanych dahetul vyšyniaŭ ź niepradkazalnym vynikam.
Kali Pucin nasamreč choča damovicca ab deeskałacyi adnosin z ZŠA, to možna čakać bolš žorstkaj reakcyi Kramla. Na moj pohlad, jość dva scenary, ab hetym šmat pisali roznyja palitołahi: ci ŭpisacca ŭ paŭhadavuju hulniu i pravieści miakki tranzit ułady, jaki zadavolić usie baki, ci sprabavać źmianić hulniu. Ale ŭ takim razie dla režymu skončycca ŭsio chutka i z horšymi nastupstvami, bo Rasija nie budzie baranić svajho nienadziejnaha sajuźnika.
Nakont kansensusu nielha być peŭnym, možna kazać, što mahčymaści dla jaho isnujuć. Toje, što Łukašenka zaminaje Zachadu, — heta zrazumieła, bieručy pad uvahu jaho staŭleńnie da pravoŭ čałavieka, mižnarodnaha prava. Pucinu Łukašenka nie padabajecca, ale jość ustanoŭka, što ŭłada pavinna źmianiacca nie na vulicach, a kanstytucyjnym šlacham. Dla Kramla heta źjaŭlajecca aksijomaj. Maskva amal hod sprabuje heta ŭžo realizavać na Biełarusi, ale Łukašenka supraciŭlajecca i kaža, što trymaje situacyju pad kantrolem.
Kansensus moža palahać u tym, što Łukašenka pierajšoŭ dla Zachadu navat nie čyrvonyja, a bardovyja linii ŭ situacyi z samalotam, a intares Kramla ŭ časovym kampramisie z Zachadam, i tut niejkaja treciaja kraina nikomu nie pavinna pieraškadžać. I ciapier chod za Łukašenkam, u jaki bok jon pojdzie».
Čytajcie taksama:
«He didn't disagree». Bajden raskazaŭ, što abmierkavaŭ z Pucinym Biełaruś
«Heta toje samaje miesca, dzie naŭrad ci treba sprabavać zblizić pazicyi — heta niemahčyma». Piaskoŭ zajaviŭ pra razychodžańnie pazicyj pa Biełarusi ŭ Pucina i Bajdena
