Pra heta havorycca ŭ dakładzie Instytuta ekanomiki i miru, jaki analizuje situacyju ŭ 163 dziaržavach, dzie pražyvaje 99,7% nasielnictva płaniety.
U daśledavańni ŭličvajucca takija faktary, jak uzrovień zhurtavanaści hramadstva, zachavańnie pravoŭ čałavieka, palityčnaja i ekanamičnaja stabilnaść, kolkaść źniavolenych u turmach, uzrovień terarystyčnaj pahrozy, abaronnyja vydatki i ŭdzieł toj ci inšaj krainy ŭ bajavych dziejańniach.
Biełaruś prademanstravała druhoje samaje rezkaje źnižeńnie ŭ rejtynhu ŭ śviecie, straciŭšy ŭ paraŭnańni ź minułym hodam 0,183 bała (8,7%). Heta apuściła krainu na 117-je miesca. Bolš indeks miralubnaści ŭpaŭ tolki ŭ Burkina-Faso (-0,254, abo 11%). Afrykanskaja kraina idzie ŭ novym daśledavańni na 134-m miescy.
«Značnaje źnižeńnie rejtynhu Biełarusi adbyłosia pad upłyvam čatyroch asnoŭnych faktaraŭ: paharšeńnie ŭzroŭniu palityčnaj stabilnaści, pavieličeńnie kolkaści demanstracyj z užyvańniem siły, uzmacnieńnie ŭnutranaha kanfliktu i paharšeńnie stasunkaŭ ź inšymi krainami», — raspavioŭ u razmovie z TASS namieśnik dyrektara ŭ navukova-daśledčaj pracy Tomas Morhan.
Pazicyja Rasii ŭ rejtynhu nie źmianiłasia ŭ paraŭnańni ź minułym hodam. Kraina ŭvachodzić u apošniuju dziasiatku śpisu, zajmajučy 154-y radok z 163. Składalniki rejtynhu tłumačać heta «vysokim uzroŭniem militaryzacyi».
Samaj miralubnaj krainaj śvietu ŭ rejtynhu zastajecca Isłandyja. Za joj u pieršaj dziasiatcy iduć Novaja Ziełandyja, Danija, Partuhalija, Słavienija, Aŭstryja, Šviejcaryja, Irłandyja, Čechija i Kanada. Apošniaja, 163-ja, pazicyja zastałasia za Afhanistanam.
