Niejki čas tamu siastra Maryi Kaleśnikavaj raskazvała, što Maryja prasiła dasłać joj noty Va pensiero («Choru pałonnych judejaŭ») z opiery Verdzi «Nabuka». Heta historyja pra pałonnych, jakich zachapiła vialikaja ŭschodniaja impieryja Navuchadanosara.
Słovy choru napisanyja pavodle Psalmu 136 (137), a sam śpieŭ staŭ u časy Verdzi nieaficyjnym himnam palityčnaha adradžeńnia Italii.
«Va, pensiero, sull'ali dorate» — dasłoŭna začyn hetaha choru pierakładajecca «Laci, dumka, na kryłach załatych».
«Kali ja tolki pavieryŭ u Boha, słovy hetaha 136-ha psalmu asabliva kranali mianie. Niadaŭna ja zrabiŭ pierakład i pierasłaŭ z notami Maryi, — piša Alaksiej Šein u fejsbuku. — Nie viedaju, ci jon da jaje dajšoŭ».
Ty laci, dumka, ptuškaj praź miežy
I spynisia, dzie rodnyja ŭzhorki,
Tam, dzie pachnuć sałodkija ziołki,
Dzie pavietra lubimaj ziamli.
Pryvitaj bierahi Ijardana,
I Sijona raźbityja viežy.
O Radzima, kraj luby, zabrany!
O, moj sumny, moj horki uspamin…
Arfy, što ž vy na vierbach visicie?
Što maŭčycie ŭ žurbie-paniaviercy?
Abudzicie ŭspaminy u sercy,
Nahadajcie byłyja časy.
I, jak horki los našaj stalicy,
Zaśpiavajcie tak skrušna j balesna.
I natchniaje chaj Hospad na pieśniu,
Što daść mocy tryvać nam usim.
Jon daść mocy tryvać nam usim.
Jon daść mocy tryvać nam usim.
Jon daść mocy tryvać.
