Adnosna aŭtobusaŭ vytvorčaści minskaha zavoda MAZ Kličko skazaŭ, što zakupki biełaruskaj techniki pačalisia ŭžo daŭno, zadoŭha da ciapierašniaha palityčnaha abvastreńnia ŭ Biełarusi.
«Jany ŭžo zakuplenyja, i šmat hadoŭ my ich zakuplali. Minskija aŭtobusy pa jakaści… Jany «minskija», viedajecie, jak? Ruchavik — «Miersiedes», karobka — francuzskaje «Piežo», heta značyć usie składniki jeŭrapiejskija, adpaviadajuć usim normam, sučasnyja. I na tendarach najlepšuju canu i jakaść jany demanstrujuć», — skazaŭ jon.
«Ciapier palityčnaja situacyja ŭ Biełarusi źmianiłasia. Ale hetyja zakupki byli da hetaha palityčnaha abvastreńnia», — raspavioŭ Kličko.
«Ja razumieju, što my pavinny padtrymlivać ajčynnaha vytvorcu, ale ŭ nas patrabavańni da ajčynnaha vytvorcy: kali łaska, jakaść! Heta vielmi važna. My možam kupić, ale kali jany nie buduć jeździć, a buduć ramantavacca, navat novyja, to heta nie vielmi dobra», — padkreśliŭ mer ukrainskaj stalicy.
Aŭtobusy MAZ daŭno zakuplali ŭ vialikich kolkaściach, u tym liku i praz tendary, roznyja harady Ukrainy — nie tolki Kijeŭ. Heta vyklikała škvał krytyki z boku ŭkrainskaha hramadstva, asabliva na fonie palityčnaha kryzisu, ź jakim sutyknułasia Biełaruś. Mer Lvova Andrej Sadavy raspavioŭ pra toje, što horad pryncypova nie budzie kuplać biełaruskija aŭtobusy, niahledziačy na ich pieramohu ŭ tendarach.
