Fota privateislandsonline.com.
U amierykanskim štacie Men jość voziera Vialikaje, a ŭ im — vostraŭ Uajts płoščaj trochi bolš za pałovu kvadratnaha kiłamietra. Niadaŭna hety vostraŭ, aryhinalnaje imia jakoha hučyć jak Pajn, źmianiŭ uładalnika. Za 355 tysiač dalaraŭ jaho nabyła karennaje plemia pasamakuodzi, što straciła jaho ž u 1861 hodzie.
Plemia zasialiłasia na Pajn nie paźniej za 10 tysiač hod tamu. Heta nievialikaja hrupa karennych amierykancaŭ pamieram u 3700 čałaviek. Vostraŭ zrabiŭsia dla ich duchoŭna važnym miescam. Tam pasamakuodzi chavali svaich rodnych, pamierłych ad vospy, chalery i adru, zaniesienych biełymi pierasialencami, piša Guardian.
U 1794 hodzie vostraŭ byŭ aficyjna padorany plemieni štatam Masačusiets za słužbu na karyść dziaržavy padčas vajny za niezaležnaść u ZŠA. Ale paśla 1820 hoda, kali byŭ vydzieleny asobny štat Men, nazvu vostrava źmianili, i praz heta damova ź plemieniem była anulavanaja. U 1851 hodzie na vostravie pad novaj nazvaj Uajts zastavałasia tolki 20 pasamakuodzi, praz 10 hod ich tam uvohule nie zastałosia.
Fota privateislandsonline.com.
4 lipienia minułaha hoda adzin ź lidaraŭ plemieni Uiljam Nikałs pabačyŭ abjavu ab prodažy vostrava. Pa stanie na sakavik pasamakuodzi zdoleli sabrać nieabchodnyja dla kupli 355 tysiač dalaraŭ i narešcie viarnuli sabie vostraŭ. Zhodna z tradycyjami plemieni, u ich nie pryniata ličyć siabie uładalnikami ziamli. Zamiest hetaha pasamakuodzi nibyta majuć śviaščenny abaviazak abaraniać jaje.
Kupla vostrava Pajn — nie pieršaja paśpiachovaja sproba karennych amierykancaŭ viarnuć sabie ziamlu, stračanuju paśla amierykanskaj vajny za niezaležnaść. Taksama šmatlikija amierykanskija arhanizacyi starajucca bolš adkryta kazać pra toje, kali jany vykarystoŭvajuć ziamlu karennych plamion. Isnuje navat śpiecyjalnaja mabilnaja prahrama, praź jakuju kožny amierykaniec moža pravieryć, ci nie naležyć ziamla, na jakoj pabudavany jaho dom, karennym narodam.
