Nahadajem, ranicaj 18 maja siłaviki ŭvarvalisia ŭ hałoŭny i rehijanalnyja ofisy Tut.by i ŭ kvatery niekalkich supracoŭnikaŭ.
U Kamitecie dziaržkantrolu zajavili, što ŭ dačynieńni da słužbovych asob TAA «Tut baj Miedyja» raspačataja kryminalnaja sprava pa prykmietach składu złačynstva, praduhledžanaha č. 2 art. 243 KK (uchileńnie ad vypłaty sum padatkaŭ, zboraŭ u asabliva bujnym pamiery). Majučy status rezidenta PVT, kampanija nibyta atrymlivała vyručku, nie abumoŭlenuju dziejnaściu, dazvolenaj dla rezidentaŭ, paviedamlaje partał.
Supracoŭniki, jakija byli ŭ hałoŭnym ofisie, i žurnalisty, što pryjechali da ich, pierastali vychodzić na suviaź. Mnohich ź ich pratrymali ŭ budynku da poźniaj nočy.
Paralelna z hetym Mininfarm abmiežavaŭ dostup da sajta Tut.by, spasyłajučysia na toje, što Hienprakuratura ŭstanaviła fakty parušeńniaŭ zakona ab ŚMI ŭ častcy raźmiaščeńnia ŭ publikacyjach zabaronienaj infarmacyi. U pryvatnaści niezarehistravanaha fondu BYSOL. Abmiežavany dostup i da inšych internet-resursaŭ TUT.BY, uklučajučy poštu mail.tut.bu i prajekt pa zbory hrošaj na lačeńnie help.blog.tut.by.
Pieratrusy prajšli ŭ hałoŭnaha redaktara Maryny Zołatavaj, redaktaraŭ Hanny Rudenka, Volhi Saŭkiŭ, namieśnika hałoŭnaha redaktara Maksima Hajko, žurnalista Aleny Tałkačovaj.
Hanna Rudenka i Volha Saŭkiŭ paśla pieratrusaŭ zastalisia na voli. Marynu Zołatavu i Alenu Tałkačovu zabrali na dopyt u DFR. Hałoŭny redaktar paśpieła paviedamić, što jana, dyrektar TAA «Tut baj miedyja» Ludmiła Čekina i hałoŭny buchhałtar kampanii Anžeła Asad mohuć prachodzić pa artykule 243 KK.
Maksim Hajko vyjšaŭ na volu ŭviečary paśla dopytu ŭ DFR, u toj čas jak niekatorych supracoŭnikaŭ pavieźli ŭ IČU na Akreścina.
U hety ž dzień siłaviki prychodzili taksama ŭ ofisy Hoster.by i av.by.
Na hety momant zatrymanyja 11 supracoŭnikaŭ TUT.BY:
— namieśnik hałoŭnaha buchhałtara Maryja Novik
— namieśnik hienieralnaha dyrektara pa techničnych pytańniach Alaksandr Dajneka
— mieniedžar Andrej Aŭdziejeŭ
— redaktar Volha Łojka
— žurnalist Alena Tałkačova
— hałoŭny redaktar Maryna Zołatava
— hienieralny dyrektar Ludmiła Čekina
— hałoŭny buchhałtar Anžeła Asad
— namieśnik dyrektara Iryna Rybałka
— hałoŭny inžynier Ała Łapatka
— juryst Kaciaryna Tkačenka.
Status zatrymanych da hetaha času niezrazumieły.
Tolki 20 maja stała viadoma, što ŭdava Juryja Zisiera Julija Čarniaŭskaja znachodzicca pad chatnim aryštam. Da taho času navat rodnyja nie viedali, dzie jana.
