12 maja ŚMI paviedamili, što ŭ vyniku rakietnaha abstrełu paleścinskimi bajevikami horada Aškiełon, jaki znachodzicca niepadalok ad miažy ź Siektaram Haza, zahinuła žančyna, a jaje muž atrymaŭ ranieńni.
U meryi Aškiełona paviedamili, što zahinułuju zvali Neli Hurevič, a kvatera, u jakoj žyła siamja, značna paciarpieła ŭ čas rakietnaj ataki. Jaje muž Ryhor, vidać, nie atrymaŭ surjoznych ranieńniaŭ — jon znachodzicca ŭ haścinicy i nie choča razmaŭlać z presaj. Taksama ŭ meryi ŭdakładnili, što Neli Hurevič było 57 hadoŭ, siamiejnaja para repatryjavałasia ŭ Izrail u 1990 hodzie.
Žurnalist haziety «Izrail siehodnia» źviazaŭsia z susiedziami siamji, jakija paviedamili, što para była zaŭsiody ź imi vietłaja, ale viała davoli zamkniony ład žyćcia, dziaciej u muža i žonki nie było. Jany paćvierdzili, što jany pryjechali ŭ Izrail ź Biełarusi, adnak nie viedajuć, adkul mienavita. Taksama stała viadoma, što siońnia projdzie pachavańnie žančyny.
Hanna Litroŭnik, jakaja žyvie ŭ Izraili, siabravała z Neli — dla jaje hibiel siabroŭki stała surjoznaj strataj.
— Viedaju Neli jak vielmi spahadlivaha čałavieka, jana zaŭsiody i va ŭsim imknułasia padtrymać mianie i inšych ludziej. Nas ź joj abjadnoŭvała cikavaść da muzyki, abiedźvie kaliści skončyli muzvučylišča. Dla mianie było šokam daviedacca, što jana zahinuła, mnie budzie jaje nie chapać… — raspaviała žančyna.
U pasolstvie Biełarusi ŭ Izraili raspaviali, što zahinułaja, pa ŭsioj bačnaści, nie była hramadziankaj našaj krainy, adnak adznačyli, što nie mohuć adnaznačna hetaha śćviardžać: tearetyčna, čałaviek moža nie ŭstavać na konsulski ŭlik i žyć u Izraili, a dyppradstaŭnictva moža nie mieć pra jaho nijakich źviestak.
— Takoj hramadzianki ŭ nas na konsulstvam ŭliku niama i infarmacyi ŭ nas pra jaje taksama niama. My źviazalisia ź izrailskim Interpołam - pavodle ich apieratyŭnaj infarmacyi, z momantu abvastreńnia situacyi siarod zahinułych hramadzian Biełarusi niama.