Bolšaść dziaciej z kavidam pieranosiać chvarobu lohka abo ŭvohule bieśsimptomna. Adnak jość ryzyka ciažkich vypadkaŭ. Za ŭvieś čas pandemii ŭ ZŠA było zafiksavana 14 tysiač špitalizacyj i 279 śmiarotnych vypadkaŭ siarod dziaciej. Tamu Li Savia Birs, kiraŭnik Amierykanskaj akademii piedyjatryi, jak i mnohija inšyja ekśpierty, zaklikaje baćkoŭ vakcynavać padletkaŭ, jak tolki jany atrymajuć na heta dazvoł, paviedamlaje The Reuters.
Bolš za toje, infikavanyja dzieci, jakija pieranosiać chvarobu bieśsimptomna, raspaŭsiudžvajuć virus siarod ludziej, što znachodziacca ŭ zonie ryzyki. Vakcynacyja budzie pa-sapraŭdnamu efiektyŭnaj u tym vypadku, kali pryščepku atrymajuć jak maha bolš ludziej. Kali nie vakcynavać dziaciej, to dasiahnuć kalektyŭnaha imunitetu budzie składaniej.
Zhodna z daśledavańniami, vakcyny Pfizer i BioNTech nie ŭjaŭlajuć ryzyki dla dziaciej. Navukoŭcy nie vyjavili dokazaŭ dadatkovaha niehatyŭnaha ŭpłyvu vakcyn na dziaciej u paraŭnańni z darosłymi. U bolšaści vypadkaŭ padletki, jak i darosłyja, majuć lichamanku i bol u myšcach paśla vakcynacyi, što prachodzić praz paru dzion. U vielmi redkich vypadkach nazirajecca alerhičnaja reakcyja na peŭnyja chimičnyja rečyvy, piša The Wall Street Journal.
Pakul što tolki vakcyny Pfizer i BioNTech dazvolenyja ŭ ZŠA dla maładych ludziej da 18 hadoŭ. Kanada i Ałžyr taksama dazvolili Pfizer dla hetaj uzrostavaj hrupy. Kampanija Pfizer paviedamiła, što dasłała nieabchodnyja dla dazvołu vakcyny padletkam źviestki ŭ inšyja orhany rehulavańnia va ŭsim śviecie, u tym liku ŭ Jeŭrapiejskaje ahienctva pa lekavych srodkach. Tamu, vierahodna, u chutkim časie vakcynacyja padletkaŭ stanie raspaŭsiudžanaj va ŭsim śviecie.
