U listapadzie ŭ Minsku na repietycyi siłaviki zatrymali hrupu barabanščykaŭ «Patrabujem razyścisia», jakaja vosieńniu stała adnym ź simvałaŭ pratestaŭ. Muzykaŭ administracyjna asudzili za ŭdzieł u niesankcyjanavanaj akcyi pratestu, ale Alaksiej paśla 15-sutačnaha aryštu tak i nie vyjšaŭ na volu. Suprać jaho raspačali kryminalnuju spravu. Na «pakajalnym videa» ANT Alaksiej paśla zatrymańnia tolki skazaŭ: «Ja vučyŭ rytm».
Pa słovach inšych zatrymanych muzykaŭ, pry zatrymańni supracoŭniki HUBAZiKa źbivali Alaksieja i patrabavali parol ad telefona. Sam Alaksiej na sudzie zajaŭlaŭ pra maralny cisk.
Zhodna ź viersijaj abvinavačvańnia, Alaksiej Sančuk «pad vyhladam masavych mierapryjemstvaŭ» u Minsku ździajśniaŭ dziejańni, jakija hruba parušajuć hramadski paradak: pierakryvaŭ prajeznuju častku, akazvaŭ vidavočnaje niepadparadkavańnie supracoŭnikam UUS, kryčaŭ łozunhi, hučna plaskaŭ dałoniami, razmachvaŭ bieł-čyrvona-biełym ściaham. Hetym jon ździejśniŭ złačynstva, praduhledžanaje č. 1 art. 342 KK.
Dziaržabvinavaŭca śćviardžaje, što z červienia pa 4 listapada 2020 hoda Alaksiej Sančuk braŭ aktyŭny ŭdzieł u masavych biesparadkach, kuplaŭ piratechniku, adkryŭ rachunak u «Technabanku» dla finansavańnia pratestaŭ.
Za błakavańnie daroh 27 vieraśnia, 18 kastryčnika, 4 kastryčnika, 25 kastryčnika, 1 listapada «Minsktrans» vystaviŭ jamu pazoŭ na sumu 161 900 rubloŭ.
Taksama pa viersii śledstva, jon «arhanizavaŭ supolnaść, dzie navučaŭ ludziej, schilaŭ asobaŭ da hrupavych dziejańniaŭ, jakija hruba parušajuć hramadski paradak». Jaho abvinavačvajuć u tym, što jon ažyćciaviŭ navučańnie asob dla ŭdziełu ŭ masavych mierapryjemstvach, ździajśnieńnia hučnych vopleskaŭ rukami, jakija parušajuć spakoj hramadzian. Heta č. 2 art. 342 KK.
Pa viersii abvinavačvańnia, z červienia pa listapad 2020 hoda Sančuk pa papiaredniaj zmovie z metaj vykazvańnia palityčnych pohladaŭ stvaryŭ telehram-čat, jaki maje ŭ svajoj naźvie słova «Kryžyki».
Pa č. 3 art. 293 i č. 2 art. 293 KK (Navučańnie ci inšaja padrychtoŭka asob dla ŭdziełu ŭ masavych biesparadkach) jaho abvinavačvajuć za toje, što ŭ jaho padčas vobšuku znajšli 67 niebiaśpiečnych piratechničnych vyrabaŭ (kštałtu «Čajnaja ruža», «Chvalisty papuhajčyk», «Šok»), pietardy, hazavyja bałončyki, 18 łaziernych ukazak, aptyčnuju sistemu nazirańnia, pnieŭmatyčnuju strelbu i inšaje.
Sančuk pryznaŭ siabie vinavatym pa č. 1 i 2 art. 342, a pa č. 3 art. 293 i č. 2 art. 293 KK — vinu nie pryznaŭ.
