«U adpaviednaści z pastanovaj namieśnika staršyni Viarchoŭnaha suda Biełarusi ad 4 maja 2021 hoda kryminalnaja sprava ŭ dačynieńni da Siarhieja Cichanoŭskaha, Mikałaja Statkieviča i inšych nakiravana ŭ Homielski abłasny sud dla razhladu pa pieršaj instancyi», — havorycca ŭ pastanovie, atrymanaj advakatam Viktaram Mackievičam.
Datu pieršaha pasiadžeńnia pryznačyć Homielski abłasny sud.
5 maja stała viadoma, što Hienieralnaja prakuratura nakiravała ŭ Viarchoŭny sud kryminalnuju spravu pavodle abvinavačvańnia Siarhieja Cichanoŭskaha i inšych fihurantaŭ.
— Zhodna z materyjałami spravy, Cichanoŭski, Statkievič, a taksama pryciahnutyja imi Sakaŭ, Papoŭ, Łosik, Cyhanovič i inšyja hramadzianie z červienia 2019 hoda płanavali arhanizacyju masavych biesparadkaŭ na terytoryi krainy ŭ pieryjad padrychtoŭki i praviadzieńnia vybaraŭ prezidenta Respubliki Biełaruś u 2020 hodzie. Dla dasiahnieńnia svaich metaŭ jany vykarystoŭvali sučasnyja palittechnałohii, kab stvaryć u nasielnictva niedavier i niehatyŭnaje staŭleńnie da pradstaŭnikoŭ dziaržaŭnych orhanaŭ, — paviedamiła Hienprakuratura.
Siarhieju Cichanoŭskamu, Arciomu Sakavu, Dźmitryju Papovu inkryminujuć nastupnyja sastavy złačynstvaŭ:
— Arhanizacyja masavych biesparadkaŭ na terytoryi Respubliki Biełaruś u 2020 hodzie (č. 1 art. 293 Kryminalnaha kodeksa Biełarusi) — ad piaci da piatnaccaci hadoŭ pazbaŭleńnia voli;
— Raspaŭsiud hrupaj asob pa papiaredniaj zmovie materyjałaŭ, nakiravanych na raspalvańnie sacyjalnaj varožaści suprać pradstaŭnikoŭ ułady i pravaachoŭnych orhanaŭ (č. 3 art. 130) — ad piaci da dvanaccaci hadoŭ pazbaŭleńnia voli;
— Pahrozy na adras staršyni CVK (č. 2 art. 191) — da piaci hadoŭ pazbaŭleńnia voli;
— Arhanizacyja hrupavych dziejańniaŭ, jakija hruba parušajuć hramadski paradak i spałučajucca z užyvańniem hvałtu ŭ dačynieńni da pradstaŭnikoŭ ułady (č. 1 art. 342 Kryminalnaha kodeksa Biełarusi) — da troch hadoŭ pazbaŭleńnia voli.
Mikałaju Statkieviču vystavili abvinavačańnie ŭ arhanizacyi masavych biesparadkaŭ (č. 1 art. 293 Kryminalnaha kodeksa Biełarusi).
Dziejańni abvinavačanych Ihara Łosika i Uładzimira Cyhanoviča kvalifikavanyja nastupnym čynam:
— Raspalvańnie sacyjalnaj varožaści i varožaści ŭ dačynieńni da pradstaŭnikoŭ ułady i pravaachoŭnych orhanaŭ, učynienyja hrupaj asob (č. 3 art. 130 Kryminalnaha kodeksa Biełarusi);
— Arhanizacyja masavych biesparadkaŭ, jakija supravadžalisia pahromami, padpałami, źniščeńniem majomaści i ŭzbrojenym supracivam pradstaŭnikam ułady (č. 1 art. 293 Kryminalnaha kodeksa Biełarusi).
