Nikała Sterdžen maje namier pryvieści svoj narod da niezaležnaści. Fota The Scotsman
U Šatłandyi na vybarach 8 maja pieramahła Šatłandskaja nacyjanalnaja partyja (ŠNP). Hetaja palityčnaja siła vystupaje za niezaležnaść Šatłandyi i maje namier pravieści novy refierendum ab adździaleńni ad Vialikabrytanii.
ŠNP atrymała ŭ novym składzie choliruda 64 mandaty. Hetaha zusim trochi brakuje dla absalutnaj bolšaści, dla jakoj patrabujecca 65 miescaŭ. Usiaho ŭ šatłandskim parłamiencie 129 kresłaŭ.
Jašče 8 mandataŭ atrymali «Zialonyja», jakija taksama za niezaležnaść.
Šatłandskaja nacyjanalnaja partyja pieramahaje ŭžo na čaćviortych vybarach zapar. Adnak upieršyniu try niezaležnickija partyi: Šatłandskaja nacyjanalnaja partyja, Zialonyja i partyja Alba byłoha premjera Šatłandyi Aleksa Sałmanda — razam atrymali pry hałasavańni pa partyjnych śpisach bolš za 50% hałasoŭ. U toj ža čas kansiervatary, lejbarysty, libierał-demakraty dy inšyja junijanisckija partyi sabrali tolki 47% hałasoŭ. Nikoli raniej takoha nie byvała. Na refierendumie ab niezaležnaści 2014 hoda «za» hałasavała 45% vybarcaŭ.
Vynik novych vybaraŭ i rekordnaja jaŭka na ich padšturchnie ŭłady Šatłandyi da arhanizacyi novaha plebiscytu ab niezaležnaści.
Šatłandyja, jak i Katałonija, dajuć prykład taho, što nacyjanalnaja identyčnaść prabivaje darohu da suvierenitetu ŭsiudy, dzie karennaj nacyi ŭdajecca zachavacca ŭ bolšaści na svajoj terytoryi, navat va ŭmovach XXI stahodździa.
