Fota flickr.com.
U zvyčajnych umovach mukarmikoz — duža redkaja chvaroba. Jana pieradajecca praz kantakt z mukoravymi hrybami, jakija razmnažajucca ŭ hlebie, na raślinach, hnoi i ćviłoj sadavinie i harodninie, dy navat u nosie zdarovych ludziej, piša VVS.
Kali ŭ čałavieka mocny imunitet, kantakt z mukoravymi hrybami dla jaho nie strašny. Ale ŭ vypadku z asłablenymi ludźmi hrybok moža paškodžvać nasavyja pazuchi, hałaŭny mozh i lohkija i navat pahražać čałaviečamu žyćciu.
U apošnija tydni indyjskija daktary sutykajucca ź dziasiatkami vypadkaŭ mukarmikozu. Naprykład, chirurh Akšaj Nair z Mumbaja śćviardžaje, što tolki za krasavik jon sutyknuŭsia prykładna z 40 pacyjentami z hetaj chvarobaj, i 11 z takich pacyjentaŭ daviałosia vydalić paškodžanaje hrybkom voka. Šmat chto z chvorych na mukarmikoz byli dyjabietykami, jakija pieranieśli kavid doma.
U inšaj mumbajskaj ustanovie, špitali Sijon, za apošnija dva miesiacy zarehistravali 24 vypadki mukarmikozu, tady jak raniej fiksavali 6 vypadkaŭ za ŭvieś hod. 11 z pacyjentaŭ špitala stracili voka, 6 čałaviek pamierli. Bolšaść z pacyjentaŭ byli dyjabietykami siarednich hadoŭ, jakija zachvareli na mukarmikoz praz dva tydni paśla vyzdaraŭleńnia ad kavidu.
U inšych haradach krainy padobnaja situacyja. Mahčyma, raspaŭsiud chvaroby źviazany z užyvańniem steroidaŭ dla lačeńnia kavidu. Jany zabivajuć zapaleńnie ŭ lohkich, ale pry hetym paharšajuć imunitet i ŭzdymajuć uzrovień cukru ŭ kryvi.
Typovyja simptomy mukarmikozu — nos zakładzieny, nosam idzie kroŭ, apuchajuć i balać vočy, abvisajuć pavieki, zatumańvajecca zrok i, pry paharšeńni stanu, čałaviek ślepnie. Na skury vakoł nosa mohuć uźnikać čornyja plamy. Daktary kažuć, što bolšaść takich pacyjentaŭ źviartajucca pa dapamohu zapozna, kali jany ŭžo hublajuć zrok.
Miedyki vymušanyja vydalać paškodžanyja hrybkom vočy, kab infiekcyja nie trapiła ŭ mozh.
Indyjskija miedyki raspaviadajuć, što ŭ niekatorych vypadkach mukarmikozu ludzi hublajuć zrok na abodvuch vačach. Preparat, jaki dapamahaje ad mukarmikozu, darahi, adna jaho doza kaštuje kala 48 dalaraŭ. Hety preparat treba ŭžyvać kožny dzień na praciahu da vaśmi tydniaŭ.
