Fota z sacsietak
Bił i Mielinda Hiejtsy vałodajuć najbujniejšym u śviecie dabračynnym fondam i 145 miljardami dalaraŭ. Pakolki para razvodzicca, jany musiać padzialić usiu sumiesna nažytuju majomaść.
Bił Hiejts źjaŭlajecca čaćviortym najbahaciejšym čałaviekam u śviecie. Jon moh by ŭznačalić hety śpis, ale 40 miljardaŭ dalaraŭ biznesmien achviaravaŭ u dabračynny fond, jaki jon zasnavaŭ razam z žonkaj.
Hałoŭny aktyŭ Biła Hiejtsa — chołdynhavaja kampanija Cascade Investment, adznačaje Bloomberg. Praź jaje biznesmien inviestavaŭ u nieruchomaść, enierhietyku i inšyja śfiery, u vyniku čało Bił Hiejts vałodaje akcyjami mnohich kampanij.
Bolš za toje, para źjaŭlajecca najbujniejšymi ziemleŭładalnikami ŭ ZŠA: Bił i Mielinda Hiejtsy vałodajuć asabniakom u Miedynie (štat Vašynhton) płoščaj bolš za 6 tysiač kvadratnych mietraŭ. Taksama im naležać niekatoryja inšyja damy.
Kali para abviaściła ab razvodzie ŭ paniadziełak, kampanija Cascade Investment pieraviała Mielindzie kaštoŭnyja papiery na 1,8 miljarda dalaraŭ. Da taho ž, Mielindzie Hiejts pierajšli akcyi apieratara kanadskaj čyhunačnaj sietki Canadian National Railway koštam kala $1,5 miljarda, a taksama akcyi amierykanskaha aŭtadylera AutoNation na sumu $309 miljonaŭ.
Vyjaviłasia, što para nie padpisvała šlubnuju damovu. Bił i Mielinda Hiejts žyvuć u Vašynhtonie, a zhodna z zakanadaŭstvam štata, sumiesna nažytaja majomaść, kali ŭ pary niama papiarednich damoŭ, musić być padzielenaja paroŭnu. U takim vypadku hety razvod moža stać samym darahim za ŭsiu historyju. Pakul što rekord trymaje razvod Džefa Biezasa z Makienzi Skot u 2019 hodzie.
Mielinda Hiejts moža stać druhoj najbahaciejšaj žančynaj śvietu z majomaściu na 73 miljardy dalary i sastupić tolki francuzskaj pradprymalnicy Bietankur-Majers, jakaja vałodaje L'Oreal i čyja majomaść aceńvajecca ŭ $83 miljardy, piša The Guardian.
Dabračynny fond Hiejtsaŭ staŭ adnym z najbolš upłyvovych u śviecie. Fond maje kala 1600 supracoŭnikaŭ, i ŭ jaho jość ofisy ŭ Jeŭropie, Azii, Afrycy i Paŭnočnaj Amierycy. Ahułam fond nakiravaŭ bolš za 50 miljardaŭ dalaraŭ na prajekty ŭ halinie achovy zdaroŭja, adukacyi, baraćby ź biednaściu i źmienami klimatu. Tolki na baraćbu z karanavirusam arhanizacyja vyłučyła 1,75 miljarda dalaraŭ.
Mielinda zaŭsiody brała aktyŭny ŭdzieł ŭ pracy fondu. U 2015 hodzie jana zasnavała kampaniju Pivotal Ventures, jakaja inviestuje ŭ prajekty, što pašyrajuć mahčymaści žančyn. A ŭ 2019 hodzie Mielinda vypuściła knihu «Momant padjomu», dzie jana raspaviadaje, jak pryjšła da fieminizmu.
Hiejtsy zajavili, što paśla razvodu jany praciahnuć kiravać svaim fondam razam.
