«Bolšaść ludziej spažyvajuć u dva razy bolš soli za rekamiendavanyja SAAZ 5 hramaŭ štodnia, padviarhajučy siabie vialikaj ryzycy sardečnych zachvorvańniaŭ i insultu, ad jakich kožny hod pamirajuć, pavodle acenak, 3 młn ludziej», — nahadała arhanizacyja. U novym dakładzie SAAZ pryviali «hłabalnyja aryjenciry dla ŭzroŭniu natryju ŭ bolš čym 60 charčovych katehoryjach», što dapamoža «palepšyć dyjety i vyratavać žyćci», piša TASS.
Aktualnaść takoj publikacyi ekśpierty patłumačyli ŭ pryvatnaści tym, što spažyvańnie «pierapracavanych praduktaŭ charčavańnia chutka pavyšaje pastupleńnie natryju» ŭ arhanizm ludziej. Pry hetym niaredka ŭ roznych krainach adnolkavyja pradukty ŭtrymlivajuć roznuju kolkaść soli. Tamu SAAZ pradstaviła «harmanizavanyja hłabalnyja aryjenciry», jakija dapamohuć dziaržavam stavić mety pa źnižeńni spažyvańnia soli i stymulavać da adpaviednych krokaŭ charčovuju pramysłovaść.
Arhanizacyja nahadała, što zadača ŭ pamianšeńni spažyvańnia soli na 30% da 2025 hoda. Takoje rašeńnie pryniała ŭ 2013 hodzie Suśvietnaja asambleja achovy zdaroŭja.
«Bolšaść ludziej nie viedajuć, kolki soli jany spažyvajuć, — zajaviŭ u suviazi z publikacyjaj dakładu hienieralny dyrektar SAAZ Tedras Adanam Hiebrejiesus. — Nieabchodna, kab krainy vypracavali palityku pa źnižeńni jaje spažyvańnia i nasielnictvu dali infarmacyju, jakaja dazvalaje zrabić pravilny vybar».
Jak adznačajecca ŭ dakładzie, SAAZ «pačała raspracoŭvać hłabalnyja aryjenciry dla ŭzroŭniaŭ utrymańnia natryju ŭ praduktach ŭ 2020 hodzie». Hetaja praca ŭličvaje «dośvied krain i rehijonaŭ, jakija staviać mety dla ŭzroŭniaŭ natryju roznych katehoryj praduktaŭ».
«Praźmiernaja kolkaść natryju ŭ dyjecie pavyšaje kryviany cisk i, jak vynik, pavialičvaje ryzyku sardečna-sasudzistych zachvorvańniaŭ», — kanstatavali ekśpierty. Źnižeńnie ž spažyvańnia soli pamianšaje hetu ryzyku, a taksama niebiaśpieku raźvićcia chraničnych chvarob nyrak, piečani, atłuścieńnia i raku straŭnika, reziumavali aŭtary dakładu.
