Ustanoŭčy schod «Sajuza» prachodziŭ u sakaviku, jaho haściami byli piśmieńnik, jaki vajavaŭ u «DNR», Zachar Prylepin, deputat Dziarždumy z Kryma, prarasijski ekśpiert Alaksiej Dzierman. Lidaram partyi mieŭsia stać Siarhiej Łušč, u minułym viadomy svaimi nieapahanskimi i nieanacysckimi pohladami.
Łušč admoviŭsia razmaŭlać z «Našaj Nivaj», tamu my pahutaryli ź siabram prezidyuma «Sajuza», ajcišnikam-słavianafiłam Uładzimiram Hruździevym. Dyk čamu «Sajuzu» admovili ŭ rehistracyi?
Uładzimir Hruździeŭ. Fota z fejsbuka
«U nas jość tolki zdahadki, infarmacyi roŭna stolki ž, kolki va ŭsich. Bačyli tolki aficyjny pres-reliz, adkazu Ministerstva justycyi na rukach pakul nie majem.
Na asnovie tych źviestak, što majem, budziem pravodzić unutrany aŭdyt, raźbiracca. Nie razumiejem, jak da nas moh trapić zamiežny hramadzianin! Pravierka ž była vielmi padrabiaznaja. Mahčyma, u nas byŭ niejki zasłany kazačok u liku kaardynataraŭ. Tak taksama byvaje. Nie viedajem absalutna».
Asabistuju pazicyju Hruździeŭ ahučvać pakul nie choča. Źviartajem uvahu, što ad vosieni Siarhiej Łušč staŭ častym hościem dziaržaŭnaha telebačańnia, tamu dumałasia, što prablem z rehistracyjaj «Sajuza» ŭźniknuć nie pavinna.
«I nam dumałasia, što ŭsio budzie biez prablem. Ale bačycie: Kastusioŭ chadziŭ na telebačańnie, a ciapier prachodzić pa kryminalnaj spravie, Łušč chadziŭ na telebačańnie — partyju nie zarehistravali. My za dvaccać hadoŭ zvyklisia da taho, što kali ty ŭ teliku, to ŭ ciabie ŭsio dobra, ale ŭ realnaści ŭ 2021 hodzie heta nie pracuje. Heta zusim nie pakazčyk».
Uładzimir havoryć, što važnym faktaram budzie, ci zarehistrujuć nastupnyja partyi, jakija paniasuć dakumienty ŭ Miniust paśla «Sajuza».
«My ž byli pieršaprachodcami, kali nie ličyć BCHD. Nam zdavałasia, što pryjšoŭ čas pieramien, što niešta źmienicca, ale bačycie jak… My nie kažam, što ničoha nie źmienicca, ale treba manitoryć. Nakolki viedaju, 15 maja budzie źjezd partyi «Ajčyna» Mikałaja Ivanova. Potym źbirajucca padavać dakumienty Łankin i Dźmitryjeŭ. Pahladzim, jak ułada na ich adreahuje».
Zdavacca «Sajuz» nie płanuje, buduć nastupnyja sproby padačy dakumientaŭ.
«Našy ludzi poŭnyja aptymizmu, bo nasamreč była praroblenaja vializnaja praca. My stolki ŭsiaho zrabili, a ciapier što, admaŭlacca? Nie, kaniečnie. Pačakajem, što skaža Miniust, praviadziom rabotu nad pamyłkami. Budziem padavać dakumienty na rehistracyju i dalej».
Novyja palityčnyja partyi ŭ Biełarusi nie rehistravalisia ad 2000 hoda.
