Pa stanie na 1 krasavika 2021 hoda ŭnutrany dziarždoŭh skłaŭ 11,763 młrd BYN, i heta maksimalnaje značeńnie za pieryjad publikacyi danych pa hetym pakaźniku. Papiaredni rekord pa ŭnutranym dziarždoŭhu pratrymaŭsia ŭsiaho miesiac.
Biełaruskaja dziaržaŭnaja zapazyčanaść mocna valutyzavanaja. Praktyčna ŭvieś zamiežny dziarždoŭh naminavany nie ŭ biełaruskich rublach. Dola rublovaj kampanienty va ŭnutranym dziarždoŭhu taksama nizkaja — kala 11,8% na 1 krasavika. Tamu pasłableńnie biełaruskaha rubla da dalara, jeŭra, juania abo rasijskaha rubla aŭtamatyčna viadzie da pavieličeńnia dziaržaŭnaj zapazyčanaści ŭ «zajčykavym» kampaniencie.
U krasaviku rubiel krychu ŭmacavaŭsia da častki valut. U suviazi z hetym rekord pa sumie doŭhu na 1 maja naŭrad ci budzie pabity. Zatoje praciah devalvacyi adkryvaje darohu da pabićcia starych rekordaŭ.
Unutrany dziarždoŭh u vypadku Biełarusi sinanimičny vypuskam ablihacyj Minfina. Na 1 krasavika abaviazki pa hetych vypuskach składali 2,714 młrd USD, 1,030 młrd EUR, 147,4 młn RUB i 1,380 młrd BYN.
Zamiežny dziarždoŭh Minfin daje ŭ dalaravym ekvivalencie. Da 1 krasavika jon dasiahnuŭ 18,123 młrd USD. Dla paraŭnańnia: na 1 krasavika źniešni dziarždoŭh byŭ roŭny 16,634 młrd USD, na 1 krasavika 2014 hoda — 12,131 młrd USD.
Vychodzić, što za 7 hadoŭ zamiežny dziarždoŭh vyras amal u paŭtara raza. U paraŭnańni z VUP Biełarusi zamiežny dziarždoŭh skłaŭ 30,4%, unutrany — 7,5%. Takim čynam, dziarždoŭh u nacyjanalnym vyznačeńni skłaŭ 37,9% ad VUP krainy.
Hodam raniej (1 krasavika 2020-ha) suadnosiny dziarždoŭhu i VUP byli bolš spryjalnymi dla ŭładaŭ — 25,5% i 6,3%. A na 1 krasavika 2014 hoda zamiežny dziarždoŭh byŭ roŭny 15,8% VUP, unutrany — 5%.
Paharšeńnie pakaźnikaŭ źviazana z devalvacyjaj biełaruskaha rubla i mocnaj valutyzacyjaj dziarždoŭhu.
Paśla šerahu kryzisaŭ biełaruskaja ekanomika da hetaha času dalokaja ad uzoru 2014 hoda. Tady VUP skłaŭ 78,9 młrd USD u ekvivalencie. Za 2020 hod VUP Biełarusi skłaŭ 60,4 młrd USD, a pa vynikach 2021 hoda pa aficyjnym prahnozam moža dasiahnuć 61, 7 młrd USD. Vidavočna, što da adznaki 2014 hoda jašče vielmi daloka.
Pa biełaruskaj mietodycy ŭ dziarždoŭh nie ŭklučajuć dziaržaŭnyja harantyi. Adnak heta robiać mižnarodnyja arhanizacyi typu MVF, Suśvietnaha banka i JEABR. Z ulikam harantyj dziarždoŭh Biełarusi na 1 krasavika skłaŭ 67,4 młrd BYN, abo 43,1% ad VUP.
