«Paśla doŭhich razvažańniaŭ i vialikaj pracy nad našymi adnosinami my pryniali rašeńnie skasavać naš šlub», — paviedamiŭ 65-hadovy fiłantrop i pradprymalnik.
Hiejts adznačyŭ, što za 27 hadoŭ u šlubie jany ź Mielindaj vyhadavali traich dziaciej i stvaryli fond, jaki pracuje pa ŭsim śviecie na karyść zdaroŭja ludziej. «My pa-raniejšamu padzialajem vieru ŭ hetuju misiju i budziem praciahvać našu sumiesnuju pracu ŭ fondzie, ale my bolš nie vierym, što zmožam raźvivacca razam jak para na nastupnym etapie našaha žyćcia», — padkreśliŭ biźniesmien.
Zasnavalnik Microsoft paprasiŭ usich pavažać ich asabistuju z žonkaj prastoru i dać mahčymaść adasobicca, kab lepš zaryjentavacca ŭ novym statusie.
Pavodle Forbes, bahaćcie Hiejtsa aceńvajecca ŭ $124 młrd, jon zajmaje čaćviortaje miesca ŭ śviecie i treciaje ŭ ZŠA ŭ śpisie samych bahatych ludziej. U svaim paviedamleńni pra razvod miljarder nie zhadvaŭ pra padzieł aktyvaŭ z žonkaj, adznačaje RBK.
Bił Hiejts paznajomiŭsia z budučaj žonkaj na pres-bryfinhu Microsoft u 1987 hodzie. Na toj momant Mielinda Frenč (dziavočaje proźvišča) na praciahu niekalkich hadoŭ pracavała ŭ kampanii na pasadzie mieniedžara adździeła prodažaŭ.
U 1994 hodzie para ŭziała šlub. U ich naradzilisia troje dziaciej — dočki Dženifier i Fibi i syn Rory.
U 2000 hodzie para zasnavała Fond Biła i Mielindy Hiejts, jaki źjaŭlajecca najbujniejšym pryvatnym fondam ZŠA, što z taho času vydatkavaŭ bolš za $53 młrd. Asnoŭnymi metami arhanizacyi źjaŭlajucca pavyšeńnie dastupnaści achovy zdaroŭja, baraćba z halečaj, pašyreńnie dostupu da infarmacyjnych technałohij i adukacyi.
Hiejtsy — siarod samych bujnych u śviecie sponsaraŭ Suśvietnaj arhanizacyi achovy zdaroŭja. Akramia taho, ich fond zajmajecca raźvićciom sielskaj haspadarki. U studzieni 2021 Hiejtsa pryznali samym bujnym pryvatnym ziemleŭładalnikam u ZŠA — jamu naležyć bolš za 1 tys. kv.km ziamli, u tym liku 979, 3 kv. km sielhasuhodździaŭ.