Tym časam nišavyja rasijskija telehram-kanały paviedamlajuć, što Ministerstva enierhietyki Rasii zaćvierdziła majskuju pastaŭku nafty na biełaruski «Naftan» u pamiery ŭsiaho tolki 50 tysiač ton. A heta, maŭlaŭ, u 14,5 razu mienš, čym u krasaviku. Pryčyna — admova bujnych rasijskich kampanij pastaŭlać naftu na pradpryjemstva z amierykanskaha sankcyjnaha śpisu.
Abjom pastavak u Mazyr źmianiajecca nienašmat (źmianšeńnie z 600 tysiač ton da 560 tysiač ton), bo Mazyrski naftapierapracoŭčy zavod nie ŭ sankcyjnym śpisie.
Krynicy «Našaj Nivy» miarkujuć, što hetaja infarmacyja adpaviadaje rečaisnaści, ale pakul šyroka nie afišujecca.
Pa ich słovach, spynieńnie pastavak nafty z Rasii stavić pad udar usiu isnuju ekanamičnuju madel Biełarusi.
Navapołacki «Naftan» moža pierapracoŭvać da 12 miljonaŭ ton nafty za hod. Jon atrymlivaŭ z Rasii 600—800 tysiač ton štomiesiac, a majskich 50 tysiač ton moža być niedastatkova navat dla taho, kab padtrymlivać zavodski cykł. Kali pieryjad deficytu zaciahniecca, to dla naftavaj haliny i ŭsioj ekanomiki nastanuć ciažkija časy.
«Kab nie dać zavodu stać, łahičnym vyhladaje adpraŭka na «Naftan» biełaruskaj nafty, jakuju my pradajom u Hiermaniju i zarablajem na hetym dobryja sotni miljonaŭ. Prablema jašče i ŭ tym, što paśla historyi z rastvaralnikami Rasija nie pastaŭlaje nam naftapradukty zvyš za vyznačanuju kvotu, tamu treba budzie vyrašać prablemu z nasyčanaściu naftapraduktami ŭłasnaha rynku», — tłumačać krynicy.
Pamiery ŭłasnaj zdabyčy ŭ Biełarusi davoli ścipłyja — 130—140 tysiač ton za miesiac. Usia homielskaja nafta idzie na zavody ŭ Hiermanii, bo heta vyhadniej, čym pierapracoŭvać jaje tut.
Ź ciomnych i śvietłych frakcyj nafty atrymlivajucca roznyja naftapradukty. Śvietłyja dyzieli i bienziny Biełaruś ekspartuje na zachad, ź ciomnych vychodzić bitum, jaki pastaŭlajecca va Ukrainu.
Faktyčnaje spynieńnie adnaho z dvuch isnujučych zavodaŭ nie dazvolić letam razharnucca na premijalnym ukrainskim rynku: jašče niadaŭna Ukraina rychtavałasia da vajny, zamaroziŭšy infrastrukturnyja prajekty, ale ciapier jany razmarožanyja. Nastupaje vysoki siezon dla budoŭli daroh i nieruchomaści, i patreby ŭ bitumie vielizarnyja.
Z ulikam taho, što pastaŭki naftapraduktaŭ z Rasii va Ukrainu zabaronienyja, usie viarški ŭ apošnija hady zdymali biełaruskija kampanii, jak praviła, prydziaržaŭnyja. Pa słovach abaznanych, u najlepšyja časy Biełaruś pradavała bitum va Ukrainu za 460 dalaraŭ za tonu, u toj čas jak u Rasii jon kaštavaŭ 220 dalaraŭ za tonu. Letaś Biełaruś pradała va Ukrainu 583 tysiačy ton bitumu, ź ich 410 tysiač ton było pastaŭlena z Mazyrskaha NPZ, jaki ŭ novych umovach naŭrad ci zmoža całkam zasiarodzicca na bitumie.
Što budzie sa śvietłymi frakcyjami, taksama niajasna, tut taksama łahičnaje skaračeńnie pastavak. Ahułam ža za 2020 hod na pastaŭkach naftapraduktaŭ Biełaruś zarabiła $2,7 miljardaŭ.
Ale heta karotkaterminovyja ryzyki i stračanyja mahčymaści, u doŭhaterminovaj pierśpiektyvie adsutnaść pastavak u Navapołack bačycca ekanamičnaj katastrofaj. Isnavańnie zavoda jak takoha moža stracić sens, a rasijanie tady zmohuć nastojvać na prodažy im hetaha aktyvu — časova nielikvidnaha.
Ale čamu ruskija zabajalisia pastaŭlać naftu?
Sprava ŭ tym, što «Rasnafta» maje vialikija supolnyja prajekty z zachodnim kapitałam, zajmajecca hieałahičnaj vyviedkaj u ZŠA i aktyŭničaje ŭ Paŭdniovaj Amierycy. I chacia sama kampanija znachodzicca pad amierykanskimi sankcyjami, jany nie majuć katastrafičnaha charaktaru i tolki skaračajuć terminy kredytavańnia «Rasnafty» amierykanskim kapitałam.
Rasijskija naftaviki pilna sočać za tym, kab nie trapić u drakonaŭski SDN-list — čorny śpis, kudy dadajuć za supracoŭnictva z kampanijami, jakija ŭžo tam jość (naprykład z «Naftanam»). Heta novaŭviadzieńnie. Raniej takoha nie było, tamu «Naftanu» i pad sankcyjami žyłosia davoli kamfortna.
Ab surjoznym staŭleńni da amierykanskich sankcyj śviedčyć i toje, što «Rasnafcie» daviałosia syści ź Vieniesueły, jak tolki pierad joj zamajačyli abmiežavańni za parušeńnie sankcyjnaha režymu.
