List Andžeja Dudy z pažadańniami z nahody Dnia polskaj dyjaspary i palakaŭ za miažoj (tak zvanaha Dnia Pałonii) pavinny atrymać aktyvisty polskaj nacyjanalnaj mienšaści ŭ Biełarusi, jakija apynulisia za kratami ŭ Minsku.
Prezident Polščy źviarnuŭsia ź listom da aryštavanych aktyvistaŭ Sajuza palakaŭ Biełarusi: Andžaliki Borys, Ireny Biarnackaj, Maryi Ciškoŭskaj i Andžeja Pačobuta, a taksama da Hanny Panišavaj — prezidenta Foruma polskich miascovych inicyjatyŭ z Bresta.
U liście z nahody Dnia Pałonii Andžej Duda vykazvaje svaju salidarnaść z usimi ludźmi, jakich pieraśledujuć u Biełarusi pa nacyjanalnych i palityčnych prykmietach.
«Vy źjaŭlajeciesia prykładam jednaści pamiž palakami dy biełarusami, jakija stvarajuć i zmahajucca za niezaležnuju Biełaruś. Palaki, što žyvuć na Biełarusi, źjaŭlajucca nieadjemnaj častkaj biełaruskaha hramadstva, i jany paŭnapraŭnyja hramadzianie Biełarusi.
Tamu jany majuć prava na svabodu, kab dalej budavać niezaležnuju i demakratyčnuju Biełaruś, a taksama dapamahać kantaktami pamiž našymi dziaržavami i narodami», — piša ŭ liście prezident Polščy Andžej Duda.
List nakiravany ŭ Minsk, u SIZA № 1, dzie znachodziacca Andžej Pačobut i inšyja pradstaŭniki polskich arhanizacyj, zatrymanyja ŭ sakaviku 2021 hoda.
