Fota pixabay.com
Strata niuchu — adzin z samych častych simptomaŭ kavidu. U bolšaści vypadkaŭ niuch viartajecca adnosna chutka paśla zakančeńnia chvaroby, ale tak byvaje nie zaŭsiody. Prykładna 20% pacyjentaŭ z takim simptomam jašče majuć prablemy ź niucham praz 8 tydniaŭ paśla pačatku kavidu.
Zaraz daktary pryznačajuć dla adnaŭleńnia niuchu kortykasteroidy — leki, što źnižajuć zapaleńnie ŭ arhaniźmie. Kortykasteroidami ŭžo karystajucca dla lačeńnia chvarob nakštałt astmy. Ale niadaŭna ŭ miedycynskim časopisie International Forum of Allergy & Rhinology źjaviłasia publikacyja, u jakoj navukoŭcy prapanujuć dla adnaŭleńnia niuchu niešta inšaje, piša VVS.
Prafiesar Karł Fiłpat, adzin z aŭtaraŭ daśledavańnia i supracoŭnik brytanskaha Univiersiteta Uschodniaj Anhlii, śćviardžaje: jość vielmi mała śviedčańniaŭ, što kortykasteroidy sapraŭdy dapamahajuć adnavić niuch, da taho ž jany časam majuć drennyja pabočnyja efiekty. Tamu daśledčyki rekamiendujuć zamiest lekaŭ tak zvanuju treniroŭku niuchu.
Voś jak heta pracuje: dva razy na dzień na praciahu niekalkich miesiacaŭ treba niuchać čatyry pradmiety sa śpiecyfičnym i lohka paznavalnym pacham, naprykład, heta mohuć być apielsiny, miata, časnok i kava. Takaja treniroŭka dapamahaje nanava navučyć mozh paznavać roznyja pachi. Heta mahčyma praz takuju asablivaść mozha, jak niejrapłastyčnaść — zdolnaść mozha źmianiacca, kab kampiensavać škodu, atrymanuju paśla traŭmy ci jak adkaz na źniešni ŭpłyŭ.
Ekśpierty kažuć, što treniroŭka niuchu — tanny i prosty sposab jaho adnavić. Navat bieź jaje 90% ludziej sa strataj niuchu paśla kavidu całkam jaho viartajuć za 6 miesiacaŭ, a ŭsim astatnim dapamoža treniroŭka.
