Źviestki pra abaznačeńnie palitviaźniaŭ prychodziać ad svajakoŭ, čyje rodnyja znachodziacca ŭ źniavoleńni ŭ Mahiloŭskaj vobłaści. Na birkach paznačajuć proźvišča viaźnia i termin źniavoleńnia. U adnym vypadku koler šryftu byŭ inšym, u druhim — birka była čyrvonaha koleru (u zvyčajnych źniavolenych jana biełaja).
«Paviesili birku čyrvonaha koleru, — kaža svajačka adnaho z asudžanaha. — Heta značyć, jon schilny da ekstremizmu. Što stała padstavaj, jon ni pa telefonie, ni ŭ liście skazać nie moža — takija temy zabaroniena abmiarkoŭvać. Ale taki status jon atrymaŭ amal adrazu, jak apynuŭsia ŭ łahiery. Jak nam patłumačyli, heta moža paŭpłyvać na skaračeńnie pieradač i spatkańniaŭ z rodnymi».
U pravaabarončym centry «Viasna» źviartajuć uvahu, što ŭ 2016 hodzie z takoj samaj prablemaj sutyknuŭsia tahačasny palitviazień Michaił Žamčužny, jamu taksama paviesili birku čyrvonaha koleru jak «schilnaha da ekstremizmu», jon byŭ abaviazany dadatkova dvojčy na dzień prachodzić pravierki.
A ŭ pieryjad aktyŭnaj baraćby z raspaŭsiudam narkotykaŭ na asudžanych pa takich artykułach viešali birki zialonaha koleru i źmiaščali ich u asobnyja atrady.
Svajaki padali skarhu ŭ AAN. Arhanizacyja pryznała, što heta dyskryminacyja. Tady administracyja kałonij admoviłasia ad takoha padychodu, i viaźniam vydali takija samyja birki, jak i va ŭsich astatnich, — biełaha koleru.
