Fota z tvitara
Na sudzie Trueba śćviardžaŭ, što «instynktyŭna» kinuŭsia na tušeńnie pažaru, jaki ŭ lutym 2019 hoda achapiŭ 144 hiektary lesu i pustak na poŭnačy Ispanii.
Adnak prakurory pastanavili, što jon sam zładziŭ pažar, kab «paciešyć eha» i «syhrać hałoŭnuju rolu» ŭ jaho tušeńni.
Jak vyśvietliłasia padčas razboru ŭ pravincyjnym sudzie Kantabryi, dzie razharnułasia hetaja drama, za niekalki hadzin da pačatku pažaru Trueba z kaleham adpravilisia ŭ patrul, bo ŭ rehijonie było abvieščana pra pavyšanuju ryzyku pažaraŭ u suviazi z zasušlivym nadvorjem. Trueba, jak uspaminaje kaleha, tady skazaŭ: «Jak sucha, varta tolki padnieści zapałku — i…»
Inšy pažarny-vałancior paviedamiŭ sudu, što abvinavačany prosta lubiŭ pažary i «pavodziŭ siabie jak narkaman paśla dozy», kali vyjaŭlaŭ uzharańnie.
Kaleham Trueby zdałosia taksama padazronym toje, što pa viartańni z tušeńnia jon dastaŭ z mašyny kanistru z-pad bienzinu i pasprabavaŭ jaje schavać.
Choć sam abvinavačany śćviardžaŭ, što ŭ čas pačatku pažaru jon advoziŭ kresły svajmu stryječnamu bratu, pa śviedčańniach navihatara ŭ jaho mašynie ŭ hety čas jon jakraz znachodziŭsia ŭ rajonie budučaha ŭzharańnia.
U vyniku sud pastanaviŭ, što «vykarystoŭvajučy bienzin, raźlity ŭ kanavie ŭzdoŭž darohi, u jakaści paskaralnika, abvinavačany stvaryŭ prynamsi 7 ačahoŭ uzharańnia na adlehłaści 65 mietraŭ adzin ad adnaho, kab ahoń lahčej raspaŭsiudžvaŭsia».
Bok abvinavačvańnia paličyŭ, što vina hora-pažarnaha niesumnienna dakazanaja i što jon dziejničaŭ «metanakiravana, naŭmysna i dobraachvotna» (sapraŭdny pažarny-dobraachvotnik!).
Prakurory nazvali śmiešnaj prapanavanuju abvinavačanym u jakaści kampiensacyi strat sumu 4 tysiačy jeŭra, padkreśliŭšy, što heta nie pakryje i dziasiataj častki naniesienaj škody.
Sud taksama nie ŭspryniaŭ surjozna mierkavańnie abarony, što ich padapiečnamu varta było b źmiakčyć pakarańnie, pakolki jon prymaŭ aktyŭny ŭdzieł u tušeńni.
«Jaho ŭdzieł u pažaratušeńni nielha nazvać ni efiektyŭnym, ni darečnym, uličvajučy, što da tušeńnia pryciahvalisia nie tolki dobraachvotniki, rola jakich była pa bolšaj častcy dapamožnaj, ale i čaćviora rejndžaraŭ, try kamandy laśničych, čaćviora prafiesijnych pažarnych, try mašyny vadzianoha tušeńnia, aŭtacysterna, pažarny pikap i dva samaloty-amfibii VPS u dadatak», — padkreśliŭ sudździa, začytvajučy vierdykt.
