Fota pixabay.com
Navukoŭka Anna Kiš z kafiedry mietearałohii budapiešckaha Univiersiteta Łarana Etvioša apublikavała vyniki svajho apošniaha daśledavańnia na temu klimatyčnych źmien. Jana źviartaje ŭvahu na toje, što ciapier u Vienhryi leta pačynajecca raniej i zakančvajecca paźniej, čym u 1970-ja hady. Ekśpierty ličać letnimi dniami tyja, kali siaredniaja tempieratura pavietra pieravyšaje 17,71 hradus pa Celsiju.
Praciahłaść astatnich siezonaŭ skaraciłasia. Bolš za ŭsio paciarpieła vosień — zaraz jana doŭžycca ŭ siarednim 85 dzion, što na 15 dzion mienš, čym 50 hod tamu, piša onet.pl.
Vienhierskija daśledčyki padkreślivajuć, što trend na padaŭžeńnie leta maje ŭstojlivy charaktar i nie abmiežavany tolki terytoryjaj Vienhryi. Takaja źjava — vynik hłabalnaha paciapleńnia, i, kali vykidy parnikovych hazaŭ nie buduć źnižanyja, usio moža jašče bolš pahoršycca. Simulacyjnaja klimatyčnaja madel pakazvaje, što ŭ takim vypadku ŭ 2100 hodzie leta ŭ paŭnočnym paŭšarji moža doŭžycca šeść miesiacaŭ, a zima — dva. Akramia ŭsiaho inšaha, heta vyklikaje źmieny ŭ žyviolnym i raślinnym śviecie.
U siaredzinie 2019 hoda hrupa šviejcarskich navukoŭcaŭ vyrašyła pradkazać, jakim budzie klimat u najvialikšych haradach płaniety ŭ 2050 hodzie, kali klimatyčnyja źmieny buduć iści z toj ža chutkaściu. Zhodna ź ich vysnovami, u hety čas łondanskaje nadvorje budzie nahadvać toje nadvorje, što zaraz charakterna dla Barsiełony. U Sankt-Pieciarburhu vy budziecie adčuvać siabie jak u ciapierašniaj Safii, a Varšava budzie nahadvać pa klimacie siońniašni Tbilisi.
