Biełsat
Sudździa Aleh Kalada paličyŭ vinu Alaksieja Lipienia dakazanaj i asudziŭ mužčynu na piać hadoŭ abmiežavańnia voli z nakiravańniem u papraŭčuju ŭstanovu adkrytaha typu (chimija). Taksama abvinavačany abaviazany spłacić kampiensacyju naniesienaj maralnaj škody paciarpiełym supracoŭnikam milicyi 5500 rubloŭ i sudovyja vydatki — 522 rubli.
Da ŭstupleńnia prysudu ŭ siłu Alaksiej Lipień byŭ vyzvaleny z-pad varty pad padpisku ab niavyjeździe i naležnyja pavodziny.
Pavodle abvinavačvańnia, Alaksiej nieadnarazova, vykarystoŭvajučy roznyja niknejmy, u tym liku «Saviecki mały», pakidaŭ abraźlivyja kamientary pad fota supracoŭnikaŭ milicyi ŭ telehram-kanale «Karniki Biełarusi» z 29 kastryčnika pa 18 śniežnia 2020 hoda.
Pavodle śledstva, svaimi dziejańniami jon pryniziŭ honar i hodnaść supracoŭnikaŭ milicyi jak pradstaŭnikoŭ ułady i jak ludziej, a taksama padarvaŭ aŭtarytet dziaržaŭnaj ułady.
Taksama abvinavačany raźmiaščaŭ kamientary nibyta z pahrozami ŭ adras šaści milicyjantaŭ, jany pryznanyja paciarpiełymi pavodle art. 364 KK.
Pa spravie prachodziła bolš za 10 paciarpiełych supracoŭnikaŭ milicyi.