Fota Nadziei Bužan
Nahadajem, što 19 lutaha minskaja supołka chryścijan poŭnaha Jevanhiella «Carkva «Novaje žyćcio» była prymusova vysielena.
U 2002 hodzie hetaja carkva vykupiła zaniadbany karoŭnik na ŭskrajku horada, adramantavała jaho, i z 2004 hoda tam prachodzili nabaženstvy. U minułym hodzie «Novaje žyćcio» atrymała sudovaje pradpisańnie vyzvalić budynak u Minsku na vulicy Kavalova, 72 da kanca hoda.
«Novaje žyćcio» — najbujniejšaja poŭnajevanhielskaja carkva Biełarusi. Sa žniŭnia jana paśladoŭna asudžała biezzakońnie i hvałt, a taksama zaklikała ŭłady da pakajańnia.
— Užo amal dva miesiacy ludzi molacca na vulicy, — kaža pastar carkvy Viačasłaŭ Hančarenka — Źbirajemsia kožnuju niadzielu na aŭtamabilnaj stajancy la budynka carkvy, ź jakoha nas vysielili. Situacyja tupikovaja, bo Minharvykankam nie idzie nam nasustrač.
— Viarnuć budynak carkvie — sprava nierealnaja?
— My, biezumoŭna, chacieli b da hetaha pryjści, abmiarkoŭvajem situacyju ź jurystami. Praŭda, minuły jurydyčny dośvied pakazvaje, što ŭ našaj krainie dastatkova składana abaranić svaje pravy.
— Novaje pamiaškańnie nie sprabavali znajści?
— Na toje, kab pravodzić słužby ŭ administracyjnych budynkach, usio roŭna patrebny dazvoł Minharvykankama. I padčas hutarki z haradskimi čynoŭnikami nam stała zrazumieła, što pamiaškańnie daduć tolki pry ŭmovie, što my apłacim doŭh, jaki my jak byccam vinny ŽREA. Chočuć paviesić na nas padatak na ziamlu, chacia, kali b budynak nie zabrali, carkva była b vyzvalena ad takoha padatku.
A patrabujuć zapłacić ni mnoha ni mała — kala 180 tysiač dołaraŭ! Adnym słovam, situacyja tupikovaja. Pamiaškańnie nam nie chočuć addavać, a my nie chočam płacić takuju sumu, bo carkva nie pavinna płacić.
My ž taki ramont cudoŭny zrabili! Možna ž było pastupić pa-ludsku — dać kampiensacyju, pradastavić novaje pamiaškańnie. A tak pakinuli bieź ničoha. Tolki ŭmovy staviać.
— Milicyja nie pieraškadžaje viernikam źbiracca na vulicy i malicca?
— Takoha nie było, chacia časam bačym i milicejskija mašyny, i z drona zdymali našy schody.
My na heta nie źviartajem uvahi. Molimsia i vierym, što Haspodź daść nam pieramohu i ŭ nas usio roŭna budzie svoj budynak.
