Śledstva vyjaviła, što kala hadziny nočy 24-hadovy kiroŭca jechaŭ na BMW pa vulicy Prytyckaha i nakiravaŭ svoj aŭtamabil na hrupu supracoŭnikaŭ milicyi. Paśla hetaha jon źjechaŭ ź miesca zdareńnia. U vyniku najezdu paciarpieli piać vajskoŭcaŭ unutranych vojskaŭ MUS va ŭzroście ad 23 da 29 hadoŭ.
— Na nastupny dzień chłopiec źviarnuŭsia ŭ milicyju z zajavaj ab zhonie aŭtamabila. Akramia hetaha, budučy dapytanym u jakaści śviedki pa spravie ab masavych biesparadkach, jon uvioŭ u zman śledčych svaimi pakazańniami, sprabujučy takim čynam syści ad adkaznaści. Niahledziačy na heta, śledčyja ŭstanavili sapraŭdnyja abstaviny zdareńnia i miescaznachodžańnie aŭtamabila — transpartny srodak byŭ znojdzieny ŭ vadajomie, — paviedamili ŭ SK.
U dačynieńni da kiroŭcy BMW była zaviedziena kryminalnaja sprava pa niekalkich artykułach KK Biełarusi.
U žaleznaj kletcy suda — 25-hadovy Cichan Vosipaŭ. Chłopiec naradziŭsia ŭ Klimavičach, maje vyšejšuju adukacyju, da ŭziaćcia pad vartu pracavaŭ inžynieram. Žanaty, dziaciej niama. Raniej sudzimy nie byŭ.
U zału pryjšli piaciora paciarpiełych — vajskoŭcy ŭnutranych vojskaŭ MUS.
Začytvajučy abvinavaŭčuju častku, prakuror Anton Ciumiencaŭ adznačyŭ, što Cichan Vosipaŭ maje pravy kiroŭcy z 2013 hoda, za hety čas jon nieadnarazova pryciahvaŭsia da administracyjnaj adkaznaści za parušeńni PDR. Paśla vybaraŭ prezidenta jon paddaŭsia zaklikam praź internet ab niepryniaćci vynikaŭ, udziele ŭ masavych biesparadkach, pahromach i padpałach.
Paśla hadziny nočy 11 žniŭnia abvinavačany kiravaŭ BMW 525 2003 hoda vypusku. U aŭto znachodzilisia pradmiety dla ŭdziełu ŭ masavych niesankcyjanavanych mierapryjemstvach: dva chakiejnyja šlemy, achoŭnyja akulary, bieł-čyrvona-bieły ściah, jod, bint. Vosipaŭ jechaŭ pa Prytyckaha, kala doma №56 jon spyniŭsia. Napieradzie była šarenha vajskoŭcaŭ z v/č 5524 UV MUS Biełarusi.
— Patrabavańniam supracoŭnikaŭ AUS Vosipaŭ nie padparadkavaŭsia: z aŭto nie vyjšaŭ, transpartny srodak dla nadhladu nie daŭ. <…> Abvinavačany mieŭ metu paźbiehnuć adkaznaści. U BMW byli źniatyja rehistracyjnyja znaki, zabłakavanyja dźviery, — paviedamiŭ prakuror.
Na dumku abvinavačvańnia, Vosipaŭ bačyŭ supracoŭnikaŭ UUS, jakija stajali da jaho śpinaj, i naŭmysna pačaŭ ruchacca na ich. Ad udaru troje vajskoŭcaŭ upali na asfalt, jašče dvoje — na kapot, a adtul — na prajeznuju častku. Paśla najezdu kiroŭca BMW paskoryŭsia i schavaŭsia ź miesca zdareńnia.
— Abvinavačany mieŭ metu na zabojstva vajskoŭcaŭ, u jakaści pryłady zabojstva jon vykarystaŭ aŭtamabil. Vosipaŭ nie zmoh davieści zadumanaje da kanca, bo ŭsie supracoŭniki byli treniravanyja i paśpieli zreahavać. Taksama jany znachodzilisia ŭ achoŭnych kaściumach.
Na vulicy Prytyckaha Vosipaŭ zajechaŭ na aŭtamabili ŭ vadajom, a paśla paviedamiŭ ab zhonie BMW na liniju «102».
Mužčynu abvinavačvajuć pa niekalkich artykułach KK: udzieł u masavych biesparadkach (č. 2 art. 293), zamach na zabojstva supracoŭnikaŭ AUS (č. 1 art. 14 i art. 362) i łžyvy danos (č. 1 art. 400).
Abvinavačany pryznaŭ vinu častkova.
