Jak paviedamlałasia raniej, ukrainskija pamiežniki ŭstanavili, što daviedki ab prachodžańni PCR-testaŭ u 35 biełarusaŭ, jakija sprabavali ŭjechać na aŭtobusie va Ukrainu ŭ punkcie propusku «Dolsk», padroblenyja.
Sami pasažyry aŭtobusa, ź jakimi ŭdałosia pahutaryć Tut.by, raspaviali, što nakiroŭvalisia ŭ turystyčnuju pajezdku ź Minska ŭ Lvoŭ: uviečary ŭ čaćvier jany pavinny byli tudy prybyć, a ŭ paniadziełak, 12 krasavika, viarnucca ŭ Biełaruś. Arhanizatary tura zajavili, što ni daviedki ab prachodžańni PCR-testaŭ dla ŭjezdu va Ukrainu, ni abaviazkovaha karancinu pa viartańni ŭ Biełaruś nie spatrebicca — nibyta ŭ ich jość damoŭlenaści.
Taksama ludziam paviedamili, što kali ŭ ich niama piarečańniaŭ, ź imi pajedzie fatohraf, jaki budzie zdymać udzielnikaŭ tura na fonie słavutaściaŭ i pomnikaŭ pryrody, kab paśla kampanija zmahła vykarystoŭvać hetyja fota ŭ rekłamnych metach.
Aŭtobus ź biełaruskimi turystami pozna ŭviečary 8 krasavika prybyŭ na punkt propusku «Makrany», dzie pierasiok biełaruskuju miažu. A voś na sumiežnym «Damanava» supravadžalnik ad turfirmy, jaki taksama jechaŭ u aŭtobusie, zajaviŭ usim pasažyram, što jany pavinny paviedamić pamiežnikam ab tym, što 7 krasavika zdavali PCR-testy ŭ adnoj sa staličnych paliklinik.
— Vyvieli z aŭtobusa traich čałaviek — mianie i jašče dźviuch žančyn. Pryviali ŭ pakoj, dzie byŭ ukrainski pamiežnik i jašče dźvie damy stajali ŭ dźviarach. Nam zadavali adno i toje ž pytańnie: «Vy zdavali test na COVID-19?» My havorym, što nie. Dalej pytańnie, jakoje nas vielmi naściarožyła, hučała nastupnym čynam: «A dzie vy pracujecie?» My skazali, a jon (ukrainski pamiežnik. — zaŭv. Tut.by) uśmichnuŭsia. [ … ] Padniaŭ stos lipavych testaŭ, jakija my bačyli ŭ pieršy raz — u ich byli našy proźviščy i imiony, — raspaviała pasažyrka aŭtobusa Lizavieta.
Pytańni ab miescy pracy taksama byli nie vypadkovyja: akazałasia, što akramia papier nibyta z vynikami testaŭ pamiežnikam pradjavili jašče i kamandzirovačnyja paśviedčańni na kožnaha pasažyra jak na ŭdzielnika rekłamnaj zdymki.
— Va ŭsich šok, u mnohich pad pytańniem staić ich praca, — kaža Lizavieta, źviartajučy ŭvahu, što ab najaŭnaści padobnych dakumientaŭ ni joj, ni inšym turystam zahadzia viadoma nie było.
Paśla hetaha supravadžalnik zajaviŭ pasažyram, što aŭtobus nie puścili va Ukrainu pa palityčnych matyvach: nibyta tam pakazali niejkaje videa z tankami ŭ rajonie Kobryna. Kali turysty paprasili ŭ jaho «PCR-testy», to jon skazaŭ, što jany zastalisia na ŭkrainskim baku.
Dalej ludziej vyrašyli vieźci na inšy pahranpierachod — «Machra»-«Dolsk». Niekatoryja ź ich vyrašyli nie praciahvać vypraboŭvać los i pakinuli aŭtobus, ale bolšaja častka ŭsio ž zastałasia. Na inšym pamiežnym pierachodzie akazałasia, što ŭkrainskija pamiežniki vyklikali palicyju.
— Maładych chłopcaŭ i dziaŭčynak z našaha aŭtobusa vyklikali na dopyt, jaki vioŭsia na ŭkrainskaj movie. Nam prynieśli pratakoły taksama na ŭkrainskaj i prymušali ich padpisvać. Ja im skazała, što nam treba razabracca ŭ situacyi i zrazumieć, što za artykuły tam pieraličanyja. Nam usim zajavili: albo vy heta padpisvajecie, albo my nie viartajem vam pašparty i ŭtrymlivajem tut da piaci sutak. Juryst biełaruskaj mytni, ź jakim my źviazalisia, paćvierdziŭ: heta ich prava, — kaža Lizavieta.
U pratakołach mnohija napisali, što ničoha nie viedali pra situacyju, jakaja skłałasia. Tam havaryłasia, što raspačataja kryminalnaja sprava ab falsifikacyi dakumientaŭ, a biełaruskija turysty vystupili śviedkami. Pakul incydent ŭładžvali, ludziej nie vypuskali z aŭtobusa, a ŭ prybiralniu vadzili z supravadžeńniem. Biełarusy praviali ŭ aŭtobusie bolš za dziesiać hadzin, u ich nie było dastatkovaj kolkaści ježy i vady — pry hetym siarod ich było jak minimum dva maleńkija dziciaci.
U vyniku našych suajčyńnikaŭ vypuścili, a na biełaruskim baku jany vymušanyja byli padpisać dakumienty, jakija abaviazvajuć ich prajści samaizalacyju, choć turahienctva abiacała, što jaje nie budzie. U vyniku aŭtobus prybyŭ u Minsk ranicaj 10 krasavika.
Pasažyry zamaŭlali tury praz roznyja kampanii, ale ŭsie jany byli pasiarednikami, a arhanizoŭvała pajezdku staličnaja firma «Chepi Uikend Treveł». Pa słovach jaje dyrektara Aliny Łapcionak, tury biez karancinu i izalacyi ažyćciaŭlalisia kampanijaj ź listapada na zakonnych padstavach, bo da čaćviarha va Ukrainu možna było ŭjechać biez testaŭ. Ab samich «padroblenych testach» jana kaža jak ab papierach, jakija niemahčyma pryniać za aficyjny dakumient.
— Heta nie padrobka testaŭ, heta nie firmovy błank. Heta prosta stos dakumientaŭ, padobnych na testy. Tam naohuł niama piačatak. Tam niama ničoha, što ŭkazvała b na ich aficyjnaje pachodžańnie. Ukrainskaja miaža adna z samych «niaŭvažlivych». Tam dastatkova było ŭkazańnia na stos papier, jaki jany nie brali ŭ ruki, i skazać, što voś heta test. Im chapała hetaha na słovach, tamu što testy byli nieabaviazkovymi, — kaža Alina Łapcionak.
Pa jaje słovach, u toj ža dzień da taho, jak aŭtobus ź biełarusami nie puścili va Ukrainu, tudy prajechali dva inšyja, pajezdku jakich ładziła kampanija — jany prosta nie paśpieli patrapić tudy da paŭnočy 9 krasavika, kali ŭstupiła ŭ siłu novaja pastanova. Jana paćviardžaje, što papiery byli zroblenyja bieź viedama turystaŭ, ale paraŭnoŭvaje ich sa śpisam hrupy, jaki robicca prosta dla zručnaści taksama bieź ich viedama.
Jašče jana padkreślivaje, što kamandzirovačnyja listy, pra jakija kazali pasažyry aŭtobusa, sapraŭdy byli zroblenyja — ale na zakonnych padstavach.
— My zakonna adpraŭlajem ludziej va Ukrainu na fotazdymku. U nas jość usie damovy z fatohrafami i hetak dalej. Jany jeduć pa kamandzirovačnym, my majem na heta dazvoł. My prajšli pravierku roznych instancyj z hetaj nahody. Ludzi biez kamandzirovačnych paśviedčańniaŭ nie prajeduć biełaruskuju miažu — jana zakrytaja. Im kazali, što jany jeduć na fotazdymku, jany heta vydatna viedali. U aŭtobusie ź imi jechaŭ fatohraf, ich čakaŭ videohraf va Ukrainie.
Jak patłumačyła Alina Łapcionak, fota i videa pa damovie pradaje inšaja jurydyčnaja asoba — kampanija «Ekahłobus», jakaja zajmajecca rekłamnym kantentam.
Pavodle jaje słoŭ, kampanija źviazałasia z pradstaŭnikami Dziaržpahrankamiteta dla taho, kab vyśvietlić pytańnie z abaviazkovym prachodžańniem biełarusami, jakija tak i nie trapili va Ukrainu, karancinu na radzimie. Turystam płanujecca viarnuć hrošy za niaŭdały tur nie paźniej za 12 krasavika, ź imi taksama źviažucca pa pytańniach kampiensacyi. Alina Łapcionak paviedamiła, što pradstaŭniki kampanii pryjazdžali na pamiežny pierachod «Dolsk» i razmaŭlali z ukrainskim bokam — pa jaje słovach, kryminalnaja sprava zaviedziena nie budzie, pakolki incydent nielha nazvać padrobkaj dakumientaŭ.
