U čaćvier Słavakija, adna ź dźviuch krain Jeŭrasajuza, jakija zakupili rasijskuju vakcynu ad kavidu «Sputnik», zabiła tryvohu. Pastaŭlenyja joj partyi adroźnivajucca ad toj viersii, jakuju vysoka acaniła aŭtarytetnaje brytanskaje vydańnie The Lancet.
Z zajavy słavackaha ahienctva pa kantroli jakaści miedycynskaj pradukcyi (Štátny ústav pre kontrolu liečiv; ŠÚKL) vynikaje, što rasijski vytvorca maje surjoznyja prablemy z kantrolem jakaści pradukcyi.
U artykule The Lancet efiektyŭnaść rasijskaj vakcyny aceńvałasia ŭ 91,6 %. Usiaho trochi mienš, čym niamiecka-amierykanskaja vakcyna Pfizer-Biontec i amierykanskaja Moderna.
Słavackija miedyki, adnak, vyjavili, što partyja vakcyny, pastaŭlenaja ŭ hetuju krainu, «maje nie tyja samyja charaktarystyki i ŭłaścivaści», jak viersija Sputnik V, jakuju recenzavaŭ The Lancet.
«Paraŭnalnaść i adnolkavaść roznych partyj, vyrablenych u roznych miescach, nie byli prademanstravanyja, — havorycca ŭ zajavie słavackaha rehulujučaha orhana. — U niekalkich vypadkach jany vyhladajuć jak vakcyny z roznymi ŭłaścivaściami (lijafilizat abo rastvor, ampuły z adnoj dozaj abo fłakony ź niekalkimi dozami, roznyja ŭmovy zachoŭvańnia, skład i mietad vyrabu», cytuje pravda.sk zajavu ŠÚKL.
Vyjaŭleńnie takich niesupadzieńniaŭ Słavakijaj moža stać novym udaram pa reputacyi rasijskaj vakcyny. Raniej zakazčyki «Sputnika» sutykalisia z prablemaj niedapastaŭki.
U adkaz Rasijski fond pramych inviestycyj (RFPI) paprasiŭ urad Słavakii viarnuć partyju «Sputnika», kab vykarystoŭvać jaje ŭ inšych krainach, havorycca ŭ paviedamleńni ŭ aficyjnym Twitter-akaŭncie vakcyny. Śćviardžajecca, što Słavakija praviała vyprabavańni «Sputnika» ŭ łabaratoryi, jakaja nie źjaŭlajecca častkaj sietki aficyjnych łabaratoryj kantrolu lekavych srodkaŭ ES. RFPI prapanavaŭ uradu Słavakii paŭtorna pravieści testavańnie «Sputnika» — na hety raz u siertyfikavanaj ŭ ES łabaratoryi.
Rasija, jakaja praviała intensiŭnuju pijar-kampaniju adnosna svajho «Sputnika», mocna adstaje pa tempach vakcynacyi ad krain Zachadu. U ZŠA vakcynavali ad kavidu ŭžo 33% nasielnictva, u toj ža Słavakii — 15%. Tady jak u samoj Rasii — mienš za 6%. Heta navodzić na dumku, što z masavaj vytvorčaściu vakcyny i łahistykaj jość pytańni.
Biełaruś zrabiła staŭku na «Sputnik», ale maje namier vyrablać jaho na łakalizavanaj vytvorčaj linii.
