Nadzieja Filipčyk. Fota z asabistaha archiva
Dyk voś — paŭtorny kavid sapraŭdy isnuje. Na žal, mnie daviałosia pravieryć heta na ŭłasnym dośviedzie, paćvierdžanym i vynikami testaŭ, i simptomami, i nastupstvami.
Čytajcie taksama: Kavid zastaniecca z nami nadoŭha, a moža i naviečna. Jak heta źmienić naša žyćcio i zvyčki
Kavid maje nastupstvy navat paśla bieśsimptomnych vypadkaŭ
Jak adčuvańni? Raspytali pieršych biełarusaŭ, jakija pryščapilisia ad karanavirusa
Pryščeplenyja ad hrypu radziej i lahčej chvarejuć na karanavirus
Kali zaražaješsia ŭ mascy, kavid časta praciakaje lahčej. Miedyki zrazumieli čamu
Pieršy raz ja zachvareła na kavid u kancy kastryčnika. Źviazvaju heta z pracaj — ja pracuju vykładčykam u adnoj ź minskich VNU, takim čynam kantaktuju ź vialikaj kolkaściu ludziej jak ułasna na pracy, tak i na šlachu da jaje. Na žal, u kastryčniku Minsk jašče nie bačyŭ masačnaha režymu.
Praz usio heta ja zrazumieła, što maju kavid, jašče da atrymańnia vynikaŭ testa. Toje, pieršaje, zaražeńnie adznačyłasia dla mianie, akramia ahulnych simptomaŭ prastudy, niezvyčajna mocnym adčuvańniem słabaści, typovaj dla hetaj chvaroby.
U psichałahičnym płanie heta ŭsio ŭsprymajecca bolš ciažka. Navat kali čakaješ kavidu, paśla ŭsich navin, što my čuli pra hety virus za apošni hod, pryniać toje, što jon jość i ŭ ciabie, trochi składaniej, čym pryniać zvyčajnuju prastudu.
Ź inšaha boku, i kavid možna pieranieści biez uskładnieńniaŭ, tamu niama pryčyn chvalavacca pry dobrym samaadčuvańni. Ale ž šmat niervujucca rodnyja, i heta ciažkim hruzam kładziecca na stan navaśpiečanaha kavidnika.
Pieršy kavid skončyŭsia dla mianie amal biez uskładnieńniaŭ. Było šmat niezvyčajnaha, stres ad samaizalacyi i čerhi ŭ palikliničnych kalidorach pa 4—5 hadzin. Ale nie baču pryčyn na heta skardzicca, bo razumieju, nakolki bieskantrolnaja ŭsia taja situacyja, u jakoj my apynulisia. U taki ciažki dla ŭsiaho śvietu i našaj krainy ŭ asablivaści čas moj dośvied — daloka nie samaje horšaje, što moža zdarycca.
Druhi kavid, taksama paćvierdžany testam, ja atrymała ŭ siaredzinie sakavika. Źviazvaju jaho ź siamiejnaj tradycyjaj sumiesnych abiedaŭ i viačeraŭ raz na tydzień (kali taksama majecie takija tradycyi, samy čas ad ich pazbaŭlacca!). Dla mianie druhaja chvaroba prachodziła bolš ciažka, čym pieršaja: vysokaja tempieratura na praciahu dvuch tydniaŭ, simptomy prastudy i, na raźvitańnie, nievialičkaja levabakovaja pnieŭmanija pa typu «matavaha škła».
Sa svajho dośviedu viedaju, što varta pravilna siabie vieści ŭ čas samaizalacyi.
Kavid — heta nie čas dla pobytavych podźvihaŭ. Kali nie majecie na ich enierhii, lepiej skarystacca, kali jość takaja mahčymaść, dastaŭkaj ježy i pakinuć užo hety pył na palicach da lepšych časoŭ.
Adpačyvajcie, čytajcie knihi i hladzicie filmy, na jakija raniej nie mieli času, a jašče napišycie ŭžo narešcie palitviaźniam — dziakujučy takim servisam, jak vkletochku.org, heta možna zrabić nie vychodziačy z chaty.
Listy palitviaźniaŭ
I pieršy, i druhi kavid vyklikali ŭ mianie padzieńnie pracazdolnaści, siarod nastupstvaŭ taksama hałavakružeńnie i pavyšanaja stamlalnaść. U pieršy raz dapamahali adnavicca joha, miedytacyja, vitaminy, dastatkovaja kolkaść snu, zaraz dziejničajuć tyja ž mietady.
Što datyčycca fizičnaj i mientalnaj nahruzki, liču, tut varta dziejničać u zaležnaści ad svajho stanu, ale pry hetym ni ŭ jakim razie nie spyniać aktyŭnaść. Nie majecie enierhii na paŭnavartasnuju treniroŭku? Zrabicie maleńki špacyr abo pašukajcie ŭ internecie maksimalna prostyja kompleksy fizičnych praktykavańniaŭ. Hałoŭnaje — nie hublać aptymizm.
I paśla pieršaj, i paśla druhoj samaizalacyi mianie niepryjemna ździviła kolkaść ludziej biez masak u hramadskich miescach. Viadoma, hetaja historyja z kavidam doŭžycca ŭžo praciahły čas i ŭsim ciažka. Ale ž našmat bolš ciažka našym cudoŭnym daktaram, i našmat bolš ciažka chvorym na kavid u biełaruskich špitalach. Da taho ž, na svaje vočy bačyła, jak lohka kavid pieradajecca pry doŭhim znachodžańni razam ź inficyravanym u zamknionaj prastory, navat pry našeńni masak i zachoŭvańni sacyjalnaj dystancyi.
Tamu, liču, kožnamu ź biełarusaŭ varta surjozna praanalizavać svaje pavodziny i padumać pra toje, što možna zrabić, kab źnizić ryzyku dla inšych i dla siabie. Niachaj naša sumlennaje staŭleńnie da svajoj krainy ŭklučaje ŭ siabie i sumlennaje staŭleńnie da svaich blizkich.
