Kastryčnicki sud Miensku siońnia razhledzieŭ administracyjnuju spravu suprać karespandenta telekanału «Nastojaŝieje vriemia» Ramana Vasiukoviča za ŭvoz u Biełaruś knihi «Biełaruski Danbas», paviedamlaje Svaboda.
19 sakavika Kastryčnicki sud Miensku viarnuŭ hetu spravu ŭ Mienski adździeł unutranych spraŭ na pavietranym transparcie «dla ŭchileńnia niedachopaŭ». Siońnia sud jaje razhledzieŭ i vynies vyrak: 20 bazavych vieličyń, što składaje 580 rubloŭ.
Na žurnalista skłali pratakoł pa č. 1 art. 19.11 KaAP (raspaŭsiud abo pieravozka infarmacyjnaj pradukcyi, jakaja źmiaščaje zakliki da ekstremisckaj dziejnaści) za ŭvoz u Biełaruś dvuch asobnikaŭ knihi «Biełaruski Danbas».
Raman Vasiukovič patłumačyŭ u sudzie, što nabyŭ knihi «Biełaruski Danbas» u Kijevie ŭ zvyčajnaj kramie dla siabie i ŭ padarunak aŭtaram. «Raspaŭsiudžvać ničoha nie źbiraŭsia», — skazaŭ jon.
Knihi jon pieravoziŭ u zvyčajnaj sumcy, nie chavaŭ ich, jany byli va ŭpakoŭcy, jon ich navat nie adkryvaŭ. Źmiest knihi Ramanu Vasiukoviču byŭ nieviadomy, jon jaje nie čytaŭ.
Pierad Novym hodam jon vyrašyŭ zrabić padarunak aŭtaru.
Sudździa pytaŭsia, dla čaho žurnalist vioz knihu, ci nie zdahadvaŭsia žurnalist pra źmiest knih?
—Jak ja moh zdahadvacca, ja ž nie paśpieŭ pračytać, ja ŭbačyŭ jaje ŭ kniharni i znajomyja proźviščy aŭtaraŭ. Vyrašyŭ nabyć adnu sabie i druhuju ŭ padarunak.
—Tolki tamu vyrašyli nabyć?
—Nu i viedaŭ što ŭ aŭtaraŭ nie było hetych knih.
—To bok vy viedali, što heta za knihi ci nia viedali?
—Ja viedaju, što maje znajomyja aŭtary hetych knih.
—Čamu vy viedali, što ŭ ich jaje niama?
—Tut jany nie kupili, napeŭna nie mahli znajści, tut jany nie pradajucca.
—Čamu jany tut nie pradajucca, vam viadoma?
—Nie, nie viadoma.
—Aŭtary vam nie raspaviadali?
—Ja nia viedaju, nie cikaviŭsia. Ja viedaŭ, što ŭ ich niama i ŭ Biełarusi jany nie mahli nabyć.
—Chto heta vam raskazvaŭ?
—Adzin z aŭtaraŭ.
—A kamu knihu vieźli?
—Iljašu, bo jon u toj momant byŭ na voli.
U čym abvinavacili žurnalista?
Raman Vasiukovič 11 śniežnia minułaha hodu viartaŭsia ŭ Miensk z kamandziroŭki ŭ Kijeŭ. U Mienskim aeraporcie mytniki vyniali ŭ jaho «dla pravierki ekstremizmu» dva asobniki knihi «Biełaruski Danbas». Materyjały pieradali ŭ adździeł unutranych spraŭ na pavietranym transparcie.
Pavodle načalnika adździełu, heta knihi «ciomna-zialonaha koleru z vyjavaj plača sałdata ŭ vajskovaj formie z emblemaj bieł-čyrvona-biełaha koleru».
Aŭtary knihi — žurnalisty «Biełsatu» Kaciaryna Andrejeva i Ihar Iljaš, vydadziena jana ŭ 2020 hodzie ŭkrainskim vydaviectvam «Folio».
Z pratakołu, składzienaha ŭ lutym na Vasiukoviča, vynikaje, što Mienskaja abłasnaja ekspertnaja kamisija 29 studzienia zrabiła zaklučeńnie, što ŭ knihach «ustanoŭlena najaŭnaść prykmietaŭ prajavy ekstremizmu».
Adnak sud pryznaŭ jaje ekstremisckimi materyjałami tolki 26 sakavika. Ramana Vasiukoviča vyklikali na hetaje pasiadžeńnie ŭ jakaści zacikaŭlenaj asoby.
U kancy žniŭnia 2020 hodu žurnalisty telekanału «Nastojaŝieje vriemia» byli pazbaŭlenyja akredytacyi MZS razam z žurnalistami inšych zamiežnych ŚMI.
