45-hadovy Alaksiej Barysaŭ trapiŭ u mahiloŭski izalater časovaha ŭtrymańnia z abłasnoj lakarni. U izalatary jon prabyŭ siem dzion. 5 krasavika jamu paščaściła vyzvalicca. U niavoli jon byŭ upieršyniu. Raniej jaho karali štrafam za bieł-čyrvona-bieły ściah na haŭbcy, paviedamlaje «Svaboda».
Ź milicyi ŭ špital, ź lakarni ŭ izalater
Alaksieja Barysava zatrymali ranicaj 23 sakavika la domu, kali jon vychodziŭ na pracu. Jak śćviardžaje mužčyna, darohaj va ŭpraŭleńnie pa baraćbie z arhanizavanaj złačynnaściu jaho biŭ adzin ź milicyjantaŭ za toje, što padymaŭ hałavu. Paśla dopytu zatrymanaha dastavili ŭ Leninski adździeł milicyi. Tam jamu stała kiepska, i chutkaj dapamohaj jaho pryvieźli ŭ abłasny špital.
U lakarni ŭ Barysava dyjahnastavali hipertaničny kryz, zafiksavali hiematomu dy kantuziju voka. Lačyli jaho šeść dzion. 29 sakavika jamu vydali na ruki vypisku, i tut ža źjaviłasia milicyja. Zatrymanaha supravadzili ŭ Leninski adździeł unutranych spraŭ horadu, a tam praz skajp razhledzieli suprać jaho administracyjnuju spravu za publikacyju im źviestak z Respublikanskaha śpisu ekstremisckich materyjałaŭ. Pa słovach Barysava, taja publikacyja źjaviłasia ŭ adnym z dvarovych čataŭ u lipieni 2020 hodu. Prysudzili 7 dzion administracyjnaha aryštu.
Dva razy na noč rabili pierakličku pa kamery
Da ranicy 30 sakavika jaho trymali ŭ «małpoŭni» ŭ milicejskim pastarunku, a ŭdzień dastavili ŭ izalater časovaha ŭtrymańnia. Kaža, što pieršyja dni ŭmovy tam byli ciarpimyja, navat vadzili ŭ duš. Potym staŭleńnie achoŭnikaŭ kardynalna źmianiłasia.
«Pa čatyry razy na dzień nas vyvodzili z kameraŭ nadhladać na kalidory. Prahułak nie davali, — kaža Barysaŭ. — Na noč uklučali zyrkaje aśviatleńnie. Zabrali paścielnuju bializnu. Štodnia pierasialali ŭ novuju kameru. U adnoj byli kłapy».
Pa słovach surazmoŭcy, u kamery pastajanna było na adnaho čałavieka bolš, čym łožkaŭ. Udzień achoŭniki zabaraniali lažać i siadzieć na ich, tolki na łaŭcy za stałom. Spać udzień taksama nie davali. Tym časam dva razy na noč rabili pierakličku pa kamery. Ludzi nie vysypalisia. Kurcam nie dazvalali kuryć.
«Siońnia zabaranili ŭnačy tamu, chto spaŭ na łaŭcy, padkładać pad hałavu kurtku, — apaviadaje dalej Barysaŭ. — Zahadali, kab adzieža visieła na viešałcy. Raili pad hałavu kłaści tapki».
Nie dali prylehčy ź ciskam, nia ŭsio addavali ź pieradač, pahrozy źniavolenamu pierakładčyku
Alaksiej kaža, što ŭ adzin ź dzion jamu stała kiepska, bo achoŭniki nie dali ŭ čas leki, prapisanyja ŭ lakarni. Sukamerniki zabili tryvohu. Jaho ŭ kajdankach zvadzili da ŭrača, a potym z vysokim ciskam nie dali prylehčy, a paraili prytulicca da ściany.
Pavodle Barysava, nia ŭsio ź pieradačaŭ prynosili asudžanym. Syr, jaki pieradała jamu žonka, prapaŭ u jačejcy zachoŭvańnia. Addali, tolki jak vypuskali. Na volu Barysaŭ vyjšaŭ 5 krasavika.
Apaviadajučy pra źniavoleńnie, jon asobna zhadvaje sukamernika Anatola Prasałoviča. Kaža, što milicyjanty pahražajuć Prasałoviču pakarańniem adrazu pa niekalkich administracyjnych spravach dy strašać navat kryminalnym pieraśledam i tym, što «zhnojać u izalatery». Prasałovič užo asudžany pavodle dvuch prysudaŭ na 14 dzion aryštu za repost publikacyi z Respublikanskaha śpisu ekstremisckich materyjałaŭ i zdymka z nacysckaj symbolikaj.
Prasałovič pašeryŭ repartaž pra vystavu pratestavaha mastactva ŭ Tokijo. Zatrymali jaho 27 sakavika. Jon pierakładčyk, krajaznaŭca dy aktyvist Tavarystva biełaruskaj movy.
