Sudy nad fihurantami «pinskaj spravy» prachodziać z 23 sakavika. Pavodle śledztva, paciarpiełymi ŭ spravie vystupajuć 109 milicyjantaŭ.
Jak raskazała «Svabodzie» mačacha abvinavačanaha Aleha Rubca Taciana, na minułym tydni ŭ chodzie sudovych pasiedžańniaŭ apytvali kala 70 paciarpiełych milicyjantaŭ Pinskaha RAUS i HAUS.
«Navat tyja ź ich, chto nie atrymaŭ nijakich cialesnych paškodžańniaŭ, vystavili pazovy na sumu ad 3 da 5 tysiač rubloŭ. Byli navat i na 7 i 8 tysiač. Zhodna z našymi padlikami, ahulnaja suma kampensacyi ciapier składaje kala 380 tysiač, — raskazvaje Taciana Rubiec. — Supracoŭniki matyvavali padobny pamier vypłat tym, što jany atrymali maralnyja pakuty. U ich taksama parušyŭsia son i apetyt, pačalisia prablemy z susiedziami. Tamu niekatoryja ź siłavikoŭ źjechali ź miescaŭ svajho stałaha pražyvańnia. Kazali, što jany adčuvali žach, byli abražanyja».
Pa słovach Taciany, adzin ź pinskich milicyjantaŭ taksama zajaviŭ, što jamu pastupała pahroza seksualnaha charaktaru.
«U čym heta prajaŭlałasia, navat nia možam vykazać zdahadku. My vielmi ździŭlenyja padobnaha rodu pretenzijam», — kaža surazmoŭca.
Taciana dadała, što siońnia, 5 krasavika, pakazańni dajuć 21 supracoŭnik Ivanaŭskaha RAUS. Jany, niahledziačy na toje, što taksama atrymali traŭmy, nia majuć da abvinavačanych pretenzijaŭ ni maralnych, ni materyjalnych.
«Jany akazalisia, moža, bolš hodnymi, kali tak možna skazać, i pa-mužčynsku ŭspryniali hetuju sytuacyju. Dajuć pakazańni mienavita pra toje, što niepasredna adbyvałasia 9 žniŭnia, pra svaje dziejańni i sutyknieńni siłavikoŭ z pratestoŭcami. Ivanaŭskija milicyjanty nikoha nie apaznali, ich apytvajuć prosta jak udzielnikaŭ», — dadaje Taciana.
Dziaržabvinavaŭca śćviardžaje, što 9 žniŭnia 2020 hodu abvinavačvanyja brali ŭdzieł u niesankcyjanavanym masavym mierapryjemstvie kala budynku Pinskaha rajvykankamu, hruba parušyli hramadzki paradak. Učynili pahromy, nanieśli supracoŭnikam milicyi ŭdary rukami, nahami i roznymi pradmietami — doškami, pałkami, vuličnymi skryniami, frahmentami tratuarnaj plitki i betonnych parapetnych plitaŭ, butelkami, kamianiami, metaličnymi vyrabami i armaturaj. Paśla čaho naŭmysna źniščyli i paškodzili transpartnyja srodki i inšuju majomaść, jakija naležali milicyi, fizyčnym i jurydyčnym asobam.
Prysud 14 pinčukam majuć abviaścić 9 krasavika. Usim im paśla padziej u Pinsku 9-10 žniŭnia vystavili abvinavačańnie pavodle č. 2 art. 293 Kryminalnaha kodeksu (Udzieł u masavych biesparadkach). Padsudnym pahražaje da 8 hadoŭ pazbaŭleńnia voli.
Viny, pa słovach Taciany Rubiec, nie pryznali Stanisłaŭ Michajłaŭ, Ihar Sałaviej, Daniił Bohnat i Alaksandar Ciareška. Usie astatnija pryznali častkova. Jany śćviardžajuć, što tolki znachodzilisia ŭ miescy sutyknieńniaŭ, adnak hvałtoŭnych dziejańniaŭ u bok siłavikoŭ nichto ź ich nie rabiŭ.
